PATAY ang usa ka maestro ug samdan ang iyang kauban dihang sila gipangbanhigan sa ilang paggawas sa gate sa Tubod Elementary School sa Barangay Tubod lungsod sa Minglanilla.

Pasado alas 5:00 sa miaging hapon, dungan nga nanggawas sa eskuylahan sila si Serafin Villahermosa, 36, minyo, taga Gorordo, Cebu City ug si Roger Maonis, taga Springwood, Minglanilla, Cebu.

Updates on President Benigno Aquino III's presidency

Usa ka motorsiklo nga gisakyan og tulo ka mga lalake ang namusil sa mga biktima.

Gihulagway nga nagsul-ob og bonnet ug itom nga jacket ang namusil.

Si SP01 Romeo Balde, imbistigador sa Minglanilla police station, nibutyag nga posibling napagan lang si Maonis ug si Villahermosa gyud ang tuyo sa mga suspek.

Gibasihan sa kapulisan ang daghang mga igo ni Villahermosa nga timailhan nga siya gyud ang tuyo nga patyon.

Nadala sa South General Hospital sa dakbayan sa Naga ang mga biktima apan gidiklarar si Villahermosa nga dead on arrival.

Nahipos sa kapulisan ang napu ka kabhang sa armas nga 9mm didto sa dapit sa nahitabuan.

Nakigtambayayong karon ang kapulisan sa Minglanilla sa pamilya ni Villahermosa aron sa pagpalawom sa imbistigasyon. (VLM)