NAMATAY ang anak ni kanhi Provincial Board member Antonio Almirante Jr. human gipusil sa iyang laing anak atol sa panag-away sa magsuon kagahapon sa buntag sulod sa ilang balay sa Sitio Suba, Brgy. Poblacion, lungsod sa Argao, Sugbo.

Ang biktima giila nga si Allan Almirante, 49, nagtrabaho sa Land Transportation Office (LTO-7). Si Almirante buwag sa iyang asawa.

Updates on President Benigno Aquino III's presidency

Namatay siya diha tungod sa mga samad sa kalawasan.

Ang suspek mao ang iyang manghod nga si Antonio Almirante III, 44, ulitawo, graduwado sa kursong nursing ug nag-review alang sa pagkuha og board exam.

Si SPO1 Arnold Abener sa Argao police station nagkanayon nga kagahapon pa sa alas 2 sa kaadlawon nang-hagis si Allan kay nagsigig reklamo sa ilang sud-an.

Wa gyud kini moundang hangtod sa pagkabuntag.

Matod pa ni Abener nga pagka-alas 9 sa buntag giingong nangsigig pang-hagit si Allan sa iyahang manghod.

Si Allan giingong nagdalag improvised nga kutsilyo diha sa sala.

Si Antonio III kinsa didto sa kwarto wa na makaagwanta sa kasaba sa pagpanghagit sa iyang maguwang.

Nabalaka usab siya hinungdan nga nikuha siya sa iyang 9mm pistol aron unta paghadlok lang sa iyang maguwang.

Apan giingong ang biktima wa manumbaling sa pagkasa ni Antonio sa iyang armas, niatake gyud kini hinungdan nga gipusil siya maka-upat ka mga higayon nga maoy nakaingon sa iyang hinanaling kamatayon.

Si Abener niingon nga si Antonio nibutyag kanila nga wa siyay intensyon nga patyon ang iyang maguwang kay igo lang unta niyang hudlaton aron mokalma.

Apan giatake gyud siya niini dala ang kutsilyo hinungdan nga iyang gipusil.

Ang ilang mga kabanay mao nay nipahibawo sa kapulisan labot sa insidente sanglit ang ilang inahan diha ra sa kwarto gumikan kay paralyzed samtang ang ilang amahan nga si kanhi Board Member Almirante duna usay gitambongang kaso.

Hinuon bulontaryong ni-surrender si Antonio sa kapulisan ug nagdumili sa pagpainterbiyu sa mga sakop sa media.