MOKABAT tulo ka semana gikan sa paglingkod sa bag-ong Regional Director sa PDEA-10 moabot na ngadto sa 21 ka mga tigpayuhot sa ginadiling druga ang nasikop gikan sa bulan sa Hunyo ning Rehiyon 10 apan kadaghanan gikan ning siyudad sa Cagayan de Oro.
Kahinunduman nga napuhag ang shabu tiangge sa Balongis, Balulang ning siyudad sa nilabay'ng mga adlaw diin 11 ka mga suspetsadong tigpayuhot ang nangasikop.
Si Juliet Caga-anan kinsa Public Information Officer sa PDEA niingon sa Sun.Star SuperBalita nga gibana-banang moabot na ngadto sa 17 ka operasyon ang gihimo sa PDEA diin 21 na ang nasikop ug 13 niini ang kasamtangan nga napasakaan na og kaso.
Gani gilantaw usab sa bago-ong director nga mao si Edwin F. Layese nga gawas sa pag-monitor og shabu, apil sa susihon ang posibleng pagbaligya og mga ecstacy sulod sa mga bar ning siyudad ug bisan sa mga social gatherings.
Dako usab ang pagdayeg ni konsehal Ian Mark Nacaya, chairman sa komite sa police, fire and public safety sa knoseho sa mga kalamboan nga nahimo sa PDEA, labina ang pagpatuman sa kampanya batok sa mga ilegal nga druga.
Giingon ni Layese nga magmalampuson lamang ang operasyon kung kanunay ang katawhan makigtambayayong sa PDEA labina gyod ang pagtaho ngadto kanila kung mamatikdan ang presensya sa mga tigpayuhot og illegal nga druga.