DILI na maihap ang gidaghanon sa mga nadisgrasya sa kadalanan dinhi sa dakbayan sa Dabaw tungod sa kakulang sa disiplina sa mga drayber.
Sa ihap sa Land Transportation Franchising and Regulatory Board kun LTFRB XI, matud ni director Abdulgafar Mohammad nga ang nagdagan karong sakyanang rehistrado sa dakbayan sa Dabaw lamang mokabat na sa 58 mil. Ug sumala usab sa Land Transportation Office XI nga ang mga lisensiyadong drayber dinhi sa dakbayan mokabat na usab sa 98 mil nga gibantayan sa 68 ka mga LTO deputized enforcers.
Sa gidaghanon nga gisulti sa LTFRB nakaseguro ko nga duna pay daghan niini ang kolorum ug sa mga lisensiyadong drayber nakaseguro usab ako nga dunay nagdala og lisensiya nga bugos nga nakamaneho.
Sa programa nga "Gikan sa Masa Para sa Masa", gisulti ni Vice Mayor Rody Duterte daghan gayung drayber nga kulang gayud sa kahibalo sa balaod sa Land Transportation nga maoy hinungdan sa mga disgrasya.
Alang kang Duterte kining maong mga aksidente sa kadalanan makonsiderar kining murder apan wala pay nasilotan nga mga nakadisgrasya sama sa silot sa kasong murder.
Gani atubangan sa mga dagkong opisyal sa LTO ug LTFRB, iyang gisugyot nga unta kutob sa mga buot makaangkon og lisensiya, dili lang yanong pagbansay ang himuon niini sa mga aplikante, apan ipailawom sa psychiatric test.
Ang aksidente sa kadalanan usa ra gayud ang makapabor ug kini mao ang sakyanan kay puthaw. Ug tawo ang tapad niini, maguba man ang sakyanan apan mahibalik ug mamahimo pa kining pulihan. Apan kon tawo na ang mahilambigit, wala na gayuy puruhan nga mahibalik pa kaniya ang kinabuhi. Ug kon mabalda man, danyos na ang iyang lawas ug kaugmaon sa biktima.
Nganong daghan man ang lisensiyadong drayber nga bisan pagsuwat sa iyang pangalan dili man gani mahibalo (pwera saway)? Nganong nakakuha man sila og lisensiya nga gani bisan mga propesyonal usahay di pa gani makapasar sa pasulit?
Alang kanako husto gyud ang sugyot ni Vice Mayor Duterte nga ipailawom sa psychiatric test ang molukat og lisensiya ug bisan sa pag-renew niini.
Apan kining tanan, usa lang ang sulbad aron makalikay kita sa disgrasya, kini mao ang DISIPLINA.
Alang sa imong sugyot ug komentaryo sulat lang sa amcorphil.leo@gmail.com. Paminawa ko sa dxRD, Commando 711 matag alas 6:00-8:00 sa buntag.