TINUOD nga 'ang galing-galing' gyud ni Mikey Macapagal Arroyo.

Kongresista na sab siya human gipaboran sa Commission on Elections sa desisyon nga gipakanaug niadtong miaging adlaw. Si Mikey, anak nila ni Kongresista sa Pampanga Gloria Macapagal Arroyo ug Mike Arroyo, maoy mag-representar karon sa party list nga Ang Galing Pinoy.

Upat ka mga komisyonado sa Comelec mihukom nga irepresentar ni Mikey ang partylist alang sa mga security guard, jeepney driver ug tricycle driver.

Apan sila si Commissioner Sarmiento ug Greg Larazabal misupak ug nagparehistro sa ilang 'dissenting opinion.' Si Chairman Jose Melo nag-abstain.

Ang pundok ni kanhi Kongresista Satur Ocampo sa Bayan Muna nagkuwestiyon sa paghimo kang Mikey nga representante sa mga sekyu ug mga drayber tungod kay bisan og unsaon nila pagtinamban og kwenta, di gyud kwalipikado ang anak ni Gloria nga magdala sa tingog sa maong mga hut-ong.

Apan dautan ba nga irepresentar ni Mikey ang mga sekyu ug mga drayber? Matud sa upat ka mga komisyonado nga di na kinahanglan nga ang usa ka tawo mahimong drayber o sekyu aron mahimong represante nila.

Sumala nila nga ang bililhon nga si Mikey miyembro sa partylist nga Ang Galing Pinoy.

Hinuon, si Komisyonado Larazabal nagsangpit sa mga probiso sa konstitusyon sa iyang 'dissenting opinion.'

Tungod sa desisyon sa mayoriya sa mga komisyonado sa Comelec, nagsugwak na karon ang mga Arroyo sa kongreso-- Gloria, iyang anak nga si Datu, laing anak nga si Mikey ug bayaw nga si Ignacio. Upat sila.

Ang pangutana -- Nakasabot ug nakasinati kaha si Mikey sa kahimtang ug panlantaw sa mga sekyu ug mga drayber? Samtang nanlimbawot ang mga balahibo sa mga sekyu ug mga drayber sa nahitabo, wa kaha usab hilasi si Mikey sa iyang gihimo?