WAY kahadlok nga nangawat og mahalong butang ang usa ka babaye sulod sa Jose Maria College nga gipanag-iyahan ni Pastor Apollo Quiboloy niadtong Lunes.

Ang babaye mao si Liberty (bansagon gitago sa SuperBalita), 24, dalaga, kanhi estudyante sa Care Giving Course sa Jose Maria College ug nagpuyo sa 1105 Amethyst Street, San Juan Subdivision, Barangay Panacan, siyudad sa Davao.

Si Antig gisikop sa kapulisan sa Buhangin Police Station human siya positibong giila sa mga biktima nga sila Suzette Cemanas, Josephine Baguio ug Joy Galeo, pulos faculty members sa Jose Maria College.

Mga biktima nagbutyag sa kapulisan nga ilang gibilin ang ilang laptop, salapi ug cellphone sa 4th floor sa maong tulunghaan apan sa ilang pagpauli sa alas 5:00 sa hapon, nahanaw na sa ilang gibutangan.

Nailhan ang suspetsado nga maoy nagkawat sa maong mga butang pinaagi sa makuting imbestigasyon ni SPO2 Josepher Quiba.

Dihang ilang gisusi ang balay sa suspetsado, narekober ang laptop nga nagkantidad og P30,000 nga gipanag-iyahan ni Cemanas, samtang ang cellphone ni Galeo giingon sa suspetado nga ilang naprenda didto sa Ros-Ver Pawnshop.

Ang inahan sa suspetsado kinsa mikuyog didto sa presinto, misaad nga iyang bayaran ang salapi nga P2,000 nga gipanag-iyahan ni Baguio.

Ang suspetsado gikustodiya sa kapulisan uban sa nabawi nga nga butang samtang gihikay ang kaso nga ipasaka batok kaniya sa mga biktima.

Sa laing bahin, namatay ang usa ka drayber human nabalintong ang iyang gimanehong truck sa alas 6:00 sa gabii niadtong Martes didto sa Sitio Pagan Grande, Barangay Tamugan, siyudad sa Davao.

Agn biktima mao si Sherwin Kintanar, 37, minyo, nagpuyo sa Cumuco St., Tacurong, Sultan Kudarat.

Si Kintanar giingon nga dead on the spot human nabalintong ang iyang gimaneho nga Mitsubishi Fuzo Cargo (plate number YAD-214) nga gipanag-iyahan sa General Trade International Philippines Inc.

Ang maong sakyanan nagkarga og 123 ka mga motorsiklo gikan sa Marilog Proper paingon na unta sa siyudad sa Davao apan nadisgrasya sa kurbada sa Sitio Pagan Grande nga miresulta sab sa pagkaangol sa helper niini nga si Reymond Octaviano. (AD)