ADUNAY panultihon ang atong mga katiguwangan nga ang dili maantigong molingi sa gigikanan, dili mahitabong makaabot sa padulngan. Kay og si kinsa og unsa kita kaniadto mao man ang hi-nungdan kun naunsa ang atong pagkakaron ug mao usab kini ang magdeterminar sa atong mamahimong umaabot.
Dul-an sa trese na ka tuig ang milabay sa dihang migradwar kami sa highschool unya gikan sa tuig 1997 sa among pagbiya sa Abellana National School nag-iyahay na kami sa paglatas sa nagkadaiyang kalsada sa kolehiyo, dinuyugan sa tim-us nga damgo sa kalampusan sa nagkadaiyang propesyon nga among napilian.
Sa subli namong panagtagbo sa akong mga classmates nga sila si Milton Tan, Edwin Sague, Gilbert Barrios ug Michael Pineda dali namong nahanduraw ang among mga kaagi kaniadto nga sama sa kwadra ang among mga classrooms kay mao kadtong higayuna nga giguba ang karaang mga istraktura alang sa mibarog na karong Cebu City Sports Complex.
Dili usab makalimut sila si Laurice Celestial og Cleofe Denoyo sa akong papel kaniadto sa mga mohimo og class reports kay nila pa, di gyud nila kapugngan ang pagbati sa kalagot tungod sa kalbaryo sa mga pangutanang akong ipasupot.
Sa among pag-abot sa Tambuli diin among gipahigayon ang among pinaka-unang Grand Reunion sa 3 ka mga curricula (General, Trade ug Evening), akong gibati ang talagsaong kalipay sa hingpit nga pagpauli sa gigikanang panimalay human sa hataas nga panahon.
Dako nakong pasalamat nila ni Wennie Pascual Tantuico, Junard Abalos, Arthur Serencio, Sammy Janson ug mga kaubanan sa dakong sakripisyo sa pag-organize sa among mga ka-batchmates ug bisan kon usa ka gatos kapin lamang ang nakatambong sa mil dos siyentos kapin namong mga kaubanan. Apan dako na kaayo kining sinugdanan sa pag-umol ug dugang pang mga kalihukan sa umaabot.
Isip Supreme Student Council President ug Seniors Class Governor sa among batch, natandog kaayo ako sa mainitong pagtagad sa akong mga kaubanan. Uban usab dinhi ang pagpasegarbo nga kaming mga produkto sa usa ka pampublikong tulunghaan wala misurender kon dili walay atrasay nga nakigbisog sa mga hagit sa kinabuhi.
Sama kanako, ang matag usa kanamo miagi sa pakigbisug aron lamang makapadayon sa pagtungha sa kolehiyo. Ang matag butang nga among mahuptan dili hinatag sa dakong kasayon ug kinahanglang imo kining ugmaron ug trabahuan. Padayon namong dad-on sa among kasingkasing ang tinguha nga makahatag og garbo sa among eskuwelahan ug sa among mga kaubanan nga kami nahimong usa ka mapuslanong miyembro sa katilingban.
Mao kini ang among mithi nga among nakat-unan sa Abellana National School kaniadto nga among gipuy-an sa pagkakarun og pabiling pagasubayon sa umaabot.