KINING paghupot og armas labi sa mga sibilyan dili kini katungod kon dili usa lang ka pribilihiyo nga gihatag sa kagamhanan. Gumikan kay sa dili pa makahupot og legal nga armas ang usa ka tawo aduna may rikisitos ug mga lagda nga sundon.
Gumikan kay pribilihiyo man puwede kining kuha-on sa kagamhanan.
Gawas sa mga pulis, militar ug security guards nga apil sa ilang training ang paghupot og armas, ang sibilyan mo-agi usab og training sa gunhandling.
Makatabang kining armas sa usa ka tawo pagpanalipod sa iyang kaugalingon batok sa mga dautang elemento sama sa kawatan ug tulisan. Kay mga armado pod kining mga kanahang kriminal.
Unya dili ra ba magpanuko pagpatay sa ilang mga biktima labi na kon magpakita og pagsukol. Apan kining armas usahay og dili gamiton sa insaktong paagi, makapatay usab sa walay igong hinungdan.
Matod pa sa iningles. “Even an empty gun can kill a person.” Labi pa kon magdanghag ang naghupot sa armas.
RESPONSABLE
Kadtong panag-away sa magsuong Almirante sa Argao dili unta mosangpot sa kamatayon sa usa ka igsoon kon responsable pa nga gunholder ang usa ka igsoon. Si Allan, ang manguwang, gipusil patay sa iyang manghod nga si Antonio ‘Junjun’ human sa init nga panaglalis. Ambot kon lisensiyado ba usab ang armas ni Junjun.
Naputong lang siguro ang suspetsado. Mao lagi kanang armas, makadugang sa init sa ulo.
Kon wala untay armas ang usa ka igsoon ug kon nagsumbagay pa lang sila, wala untay kinabuhi nga makalas.
Mao pod ang nahitabo sa usa ka security guard ug sa security agency supervisor.
Gipusil sa guwardiya nga si Jessie Jumadiao ang iyang supervisor nga si Sebastian Abne gumikan lang sa lalis kabahin sa P500 nga amutan. Unya ang suspetsado duna nay agi kay mao usab kini ang mipusil patay sa rent a car driver niadtong 2009 sa airport.
Pastilan nganong gipabalik man sa serbisyo ang maong guwardiya nga utok man ni og pulbura.
AKSIDENTE
Gumikan gihapon kadanghag paggunit og armas, usa ka bag-ong pulis ang napatay sa kaubang niyang pulis human gition ngadto sa biktima og kalit nga mibuto. Nabugtu-an sa iyang kinabuhi si PO1 Ronnie Barrita pipila ka oras sa tambalanan human aksidenteng napusilan sa iyang suod nga higala ug buddy-buddy nga si PO1 Ronnie Barangian.
Nagkomedya ra si Barangian sa pagtion sa iyang armas kang Barrita sa dihang kalit kining mibuto.
Na-igo si Barrita sa ubol-ubol diin ang bala milagbas sa iyang tangkugo. Na-operahan kini apan namatay gayod. Anak siya ni Inspector Pepe Barrita sa Commel Group sa PRO 7 ug pag-umangkon ni Atty. Eddie Barrita, kulumnista ning pamantalaan. Dili lagi maayo magduwa-duwa og armas. Hinaot nga magsilbi kining leksiyon.
(bobby@sunstar.com.ph)