KASONG murder ipasaka sa kapulisan sa dakbayan sa Lapu-Lapu batok sa security guard nga nipatay sa operations manager sa Mustang Security Agency sa Mactan Cebu International Airport Authority (MCIA).
Niadtong Martes sa hapon, si Sebastian Abne, usa ka retired nga master sergeant, nagbantay diha sa MCIAA, gipatay sa security guard nga si Jessie Jomadiao, lumad nga taga Northern Samar.
Si SPO2 Rolito Jumao-as, imbestigador sa homicide section sa Lapu-lapu City Police Office, niingon nga kasong murder ang ilang ipasaka batok kang Jomadiao.
Kini tungod kay adunay mga elemento sa murder nga ilang nakita inay kasong homicide.
Gipasabot ni Jumao-as nga una, ilang nakita nga giplano gyod sa suspek ang pagpatay.
Ika-duha, way armas ang biktima aron makasukol ug ika-tulo adunay pagbudhi sa gikatahapan sa biktima.
Hinuon, ang gikatahapan niangkon nga napuno gyod siya tungod sa pagsigeg pangasaba ug pagpakauwaw kaniya sa biktima.
Samtang gihulga pa siya nga di na lang siya patrabahuon ug kutob na lang siya sa Biyernes sunod semana kon di siya makabayad sa P500 nilang amutan alang sa ilang training nga gipahigayon
Iyang gibutyag nga atol sa napawong ang iyang panan-aw ug nalimot na siya sa iyang kaugalingon hinungdan nga iyang nahimo ang kremin. (DRT)