DUHA ka mga taxi driver gitulis sa managlahing oras ug dapit sa dakbayan sa Mandaue, usa niini gipusil patay gyod sa mga tulisan.

Kini maoy ika-upat ug ikalima nga tulis sa mga taxi sa maong siyudad sulod lang sa pipila ka mga adlaw. Sa lima ka mga kaso, duha niini gipatay gyod ang mga driver.

Updates on President Benigno Aquino III's presidency

Nahitabo ang pagtulis ug pagpatay pasado alas 10 sa miaging gabii sa may Barangay Tingub.

Ang gitulis mao ang Cat’s Taxi (body no. 3478, plate no  GXD-642) nga gimaniho ni Modesto Bosmeion Heligao, 38, taga Barangay Polpogan, lungsod sa Consolacion.

Si Heligao patay nang napalgan sud sa iyang taxi ug dunay usa ka samad pinusilan sa ulo.

Sa imbestigasyon sa kapulisan sa station-4 pinangulohan ni PO3 Joselito Catabas, ang taxi unit sa biktima nakit-an sa mingaw diin didto siya sa sud naglingkod apan natumba ang lawas sa lingkuranan sa passenger side.

Nakit-an sa kapulisan nga adunay usa ka samad pinusilan sa iyang ulo.

Nagsiga pa sab ang suga sa taxi ug nag-andar ang aircon.

Duna say nakit-ang skid mark sa ligid nga mga duha ka metros ang gitas-on.

Matod ni Catabas nga nagsubay sa Brgy. Tingob ang taxi samtang wa mag-on ang meter.

Sa ilang imbestigasyon, nasakyan og di mominus tulo ka mga tawo ang biktima sa Brgy. Canduman ug paghiabot sa lugar gitulis ang biktima.

Hinuon wa madala sa mga tulisan ang kuwarta sa biktima nga dul-an sa P2,000 samtang diha pa usab ang iyang lisensya.

Gihulagway ni Catabas nga hayag ang nahitaboan tungod kay aduna may suga ang poste, apan naatol lang sa pagtulis nga way tawo nga nakasaksi. 

Si Chief Insp. Elmer Fernandez, hepe sa City Investigation Detective Management Branch (CIDMB), niingon nga tulis gyod ang motibo.

Apan posibleng nangaratol ang mga tulisan human mapusili ang biktima nanagan kini nga way dala.

Matod ni Fernandez nga aduna na silay gisunod nga mga tawo nga posebling maoy nihimo sa kremin.

Sa miaging semana, usa usab ka drayber sa taxi gitulis sa Barangay Alang-Alang, diin gipatay usab ang biktima.

Ang ika-duhang pagpanulis nahitabo kagahapon pasado ala 1 sa kadlawon.

Ang biktima giilang si FelixVergara, 42, driver sa M and J Taxi (plate no. GXN-847) taga lungsod sa Consolacion, Sugbo.

Ni-report gilayon sa Opao Police Station sa Mandaue City Police Office (MCPO) si Vergara.

Sigun sa iyang asoy nga nisakay kaniya ang tulisan sa dan V. Rama, dakbayan sa Sugbo.

Apan paghiabot sa barangay Opao gitulis siya ug nadala ang iyang cell phone ug kapin sa P2,000 nga kita.

Sa gihimong follow-up operation sa station-5 pinangulohan ni Sr. Insp. Alfredo Ortiz, ilang nasikop si Jorem Mendoza, alyas Onse, taga barangay Umapad.

Si Mendoza positibong giila ni Vergara nga maoy nitulis kaniya.

Apan hugtanong gihimakak sa suspek nga iyang gitulis ang driver. Niangkon siya nga wa niya plitihi si Vergara.

Samtang giimbestigar, usa ka Joseph Olmedo niabot sa presinto ug niila sa suspek nga maoy nidunggab kaniya niadtong Mayo 1.Si Ortiz niingon nga dugay na silang nangita sa suspek tungod kay suspek sa mga tulis sa taxi ug PUJ sa ilang dapit.