GIBUGALBUGALAN lang sa negusyanting insek nga tag-iya sa ISJ plastic factory nga gireklamo sa mga lumolupyo sa sityo Pangpang, San Isidro, Talisay City ang mga opisyal sa siyudad tungod sa wa pagtuman sa closure order sa ilang establisemento.
Kini maoy masuk-anon nga pamahayag sa gatusan ka mga lumolupyo sa sityo Pangpang nga dugay nang nagreklamo sa operasyon sa ISJ nga nakahatag og kahasol kanila.
Nagtunaw og plastic ang maong pabrika ug gireklamo sa mga lumolupyo ang kabaho sa aso nga gibuga sa panghaw sa maong establisemento.
Pagpanakit sa tutonlan, pagpangalipong, ubo, hubak ug pagkasinati og mga sakit ang nahiaguman sa mga lumolupyo nga naglipot sa pabrika.
Duna nay closure order kaniadto si Mayor Socrates Fernandez batok sa ISJ apan nagpadayon gihapon sa operasyon ang pabrika.
Si Gloria Parba, 66, minyo nga nagpuyo luyo sa pabrika nagkanayon nga duha na ka semana kapin nga nibalik sa pagtunaw og plastic ang ISJ.
Tungod sa kabaho nga mugna sa pabrika, gibato sa mga lumolupyo niadtong alas 8:00 sa miaging gabii ang ISJ.
Si Teodoro Salbado nitug-an sab sa mga tigbalita nga silang mga nagpuyo duol sa ISJ nanawagan sa mga opisyal sa Talisay nga dalion ang pagpasira sa planta tungod kay nahulga na ang ilang mga kinabuhi.
Duha ka mga menor de edad ang nangamatay niadtong buwan sa Abril nga gitumbok nilang gumikan sa baho nga gibuga sa pabrika.
Gisuwayan sa mga tigbalita ang pagpakighinabi sa tag-iya sa pabrika aron pagkuha sa ilang habig apan ang guwardiya nga si Michael Bulalaqui wa mopasud ug nitug-an nga tua sa Manila ang tag-iya.
Si Konsehal Bernard Odilao, chairman sa committee on environment sa konseho nipahibawo nga alas 2:00 kagahapon sa hapon, gipadala na nila ang closure order sa ISJ pinaagi sa usa ka executive order ni Mayor Socrates Fernandez.(Vincie L. Monterde)