DUHA ka kaso sa pagpanulis ang natala kagahapon sa Police Station 2 (PS2) sa Cogon ning siyudad sa Cagayan de Oro.

Unang pagpanulis natigayon kagahapon mga alas 3:00 sa kadlawon sa Pinikitan, Camaman-an ning siyudad sa Cagayan de Oro diin ang 22 anyos nga biktima walay nahiblin nga gamit.

Igo na lamang nga nagpatabang sa PS2 si Jhunrey Sambaan-Himanan, ulitawo, taga Relocation, Barangay Indahag ning siyudad.

Gisasaysay sa biktima gikan kini sa higala niadtong tungora ug paingon na untang mouli dihang giatangan sa duha ka mga suspetsado diin usa niini babaye ang mition kaniya og kutsilyo sa iyang liog. Nideklarar dayon og tulis.

Nakuha ang iyang cellphone mobalor og P3,500, cash nga P500. uban sa iyang pitaka nga adunay personal nga mga importanteng dokumento.

Usa sa suspetsado nailhan nga usa ka muslim ug giila sa pangalan nga potaw samtang ang kaubang babae niini gikumpirmang usa ka tomboy.

Samtang sa laing bahin nagpatala gihapon sa PS2 sa Cogon ang motorela driver nga mao si Vivencio Sabal-Villasencio, 46, minyo, taga St. John Puntod ning siyudad human ang iyang duha ka mga pasahero gitulis sa upat ka mga wala mailing batan-on niadtong Miyerkules mga alas 9:00 sa gabii sulod sa iyang motorela.

Gisaysay sa driver nga misakay kaniya ang duha ka pasahero apan mipara usab ang laing upat ka mga batan-on, apan paghidangat sa Daumar-Jr. Borja St., kalit lang mideklarar og tulis ang upat ngadto sa iyang pasahero.

Wala na makatingog ang duha ug igo na lamang gipanghatag ang ilang mga butang human sa insidente.

Gibutyag sa driver nga imbes dalahon niya sa presintuhan ang mga biktima mikanaog na usab kini sa motorela hinungdan nga wala makuha ang mga pangalan niini. Ang upat sab nga nagpatuong mga pasahero daling misibat ug miambak sa motorela.

Hinuon ang kasong pagpanulis gisunod na sa kapolisan sa PS2 ning panahona labina namatikdan ang pagsiaw niini. (SVB)