USA ka babayeng polis ang gikuotan hinungdan nga gigukod niini ug malampuson nga nasikop kagahapon mga alas 9:00 sa buntag sa Jr. Borja St., Cogon ning siyudad sa Cagayan de Oro.

Giila ang polis nga mao si Police Officer I Noreen Valmoria, na-assign sa Villanueva Police Station.

Nasapon niini ang isnatser nga mao si Rudy Mingo, alyas Danny, 35, taga Barangay 35 ning siyudad sa Cagayan de Oro.

Si Valmoria nga nainterbyu sa Sun.Star SuperBalita nisaysay nga out going siya sa iyang duty ug nahidangat ning siyudad kay adunay lakwon dihang nahitabo ang insidente.

Nabantayan ni Valmoria nga gikuot ang iyang cellphone nga anaa sa bulsa

hinungdan nga dihang midagan ang suspetsado dali kining gigukod ug gibira ang t-shirt hinungdan sa pagkasapon niini.

Ang mga istambay sa dapit nga nakamatikod sa nahitabo gitabangan usab og kulata si Mingo.

Matud ni Police Inspector Buenaventura Reyes sa Police Station 2 (PS2) sa Cogon nga suwerte kayo nga polis ang gibiktima niini tungod kay magsige na kini og panguot sa dapit.

Nasayran nga gawas sulod na usab kini sa prisuhan sa Cogon sa kaso gihapon nga pagpanguot apan dili mapasakaan og kaso tungod kay dili naman mo-file ang mga biktima.

Ang asawa sa suspek mibutyag sab sa Sun.Star SuperBalita nga problema kayo kaniya ang iyang bana tungod kay trabaho gyod niini ang mangout bisan makapila na ka higayon kini nga badlungon.

Nasayran usab nga dili lang si PO1 Valmoria ang nabiktima niini kagahapong adlawa apan gibiktima usab ang mismong silingan.

Kasong pagpangawat ang isang-at batok sa suspek ning panahona. (Stephanie V. Berganio)