GIKATAHO nga mikapin na sa 2 mil ka mga bata ang gitakboyan sa sakit nga dengue dinhe lamang sa siyudad sa Davao. Di pa usab dugay, ang lalawigan sa Davao del Sur gideklarar ubos sa state of calamity tungod sa pag-ulbo sa sakit nga dengue.
Ang dengue nga minugna sa pinaakan sa lamok dili mahimong pasagdan lang tungod kay mamiligro ang kinabuhi sa bata kun dili dayon ipahiling sa doktor. Kinahanglan nga ma-monitor a doktor ang CBC platelet sa pasyente ug kun mubo na kaayo angay na gyud isud sa ospital.
Nasayran nga mga health personnel sa kagamhanan nangapod-apod karon og mga basahon nga magsilbing giya sa paglikay sa dengue. Bisan ang Sun Star SuperBalita Davao nagbatun usab matag guwa niini og mga kasayuran unsaon sa paglikay sa sakit.
Dunay mga lugar nga wa makapahimulos sa fogging mibalik sa karaan nga paagi nga mao ang pagpa-aso sa palibot sa ilang bay aron pag-abog sa mga lamok.
Apan usa ka butang nga di unta kalimtan sa kagamhanan.
Kini mao ang pagsiguro nga dunay "available" nga hospital room alang sa mga gi-dengue karon nga midagsang kining sakita. Sa miaging semana naglisud ang mga ginikanan sa mga batang gi-dengue tungod kay puno ang tanang hospital.
Labing maayo nga ma-plano unsay buhaton sa mga hospital sa mga "emergency cases" sa higayon nga puno na ang ilang mga lawak. Di sab maayo nga ilang balibaran ang mga grabe na nga kaso sa dengue tungod lamang sa rason nga puno na ang mga lawak sa hospital.