DI MATUKIB ang gibating kalipay sa pamilya sa sundalo human gibuhian sa mga rebeldeng New People's Army si Senior Sergeant Bienvinido Arguilles niadtong Martes sa hapon.
Bisan ang katawhan ug ang simbahang Katoliko nalipay sab tungod kay gidungog ang ilang pag-ampo sa matag kasaulogan sa pulong sa kapilya ug misa sa simbahan.
Gawas sa mga pag-ampo, nihimo sab og signature campaign ang katawhan sa lugar.
Si Ramona Arguilles, inahan sa sundalo, didto sa lungsod sa Sta. Cruz, Davao del Sur labihan ang pagmaya ug alang niya way kabutangan sa iyang kalipay.
"Salamat gid, gapasalamat ko sa inyo, dong, nga ginpauli ninyo ang akong anak. Nagpasalamat kaayo ko sa tanan nga gapapauli sa akon anak. Sa tanan nag-ampo. Gakson ko gyud siya agad kay but-an kaayo ang akong anak," pung ni Ramona kinsa nagtulo ang luha sa tumang kalipay.
Sumala ni Ramona nga nakadawat sila og tawag niadtong Lunes sa gabii nga nagkanayon nga buhian na ang ilang anak gikan sa wa magpailang sakop sa NPA.
Banda alas 4 sa kaadlawon niadtong Miyerkules, nilarga ang asawa ni Arguilles nga si Loth kuyog ang ilang anak aron sugaton ang iyang bana didto sa dapit nga gibuhian sa sundalo.
Naghangyo sab ang pamilya ngadto sa mga opisyal sa 10th Infantry Division (ID) nga didto na sa Camp Panacan madestino si Arguilles. (Dondon Dinoy)