USA ka pulis ang gipusil, patay sa suspetsadong karnaper sa alas 2:00 sa hapon niadtong Miyekules didto sa Maasim, Sarangani Province.

Sa pakighinabi, giila ni Sarangani PNP Provincial Director Florendo Quidilla ang biktima nga mao si PO3 Ruben Pelayo, taga-Magpet, North Cotabato apan na-destino sa Maasim.

Samtang ang suspek sa pikas bahin, nailhan nga si Anthony Arinsulat, kinsa nag-atubang og kasong carnapping ug frustrasted murder tungod sa pagpangarnap og motor sa Alabel sa milabay'ng semana ug pagpusil sa tag-iya sa motor.

Matud pa ni Quidilla, motunol unta og arrest warrant si PO3 Pelayo kang Arinsulat, apan pag-abot niya duol sa bay sa suspek, giatngan ang pulis ug gipusil gamit ang kalibre .45 nga pistola.

Gilayong gidala sa ospital ang biktima apan gideklara nga dead on arrival sa Maasim District Hospital.

Ang pulis naka-angkon og mga samad sa iyang dughan ug likod nga bahin sa lawas.

Nakuha gikan kang Arinsulat atol sa "follow-up operation" sa kapulisan ang motor nga gikarnap niya sa Alabel sa milabay'ng semana.

Ang suspek nag-atubang pa og laing kasong murder tungod sa pagpusil-patay kang Pelayo. (Edgardo Fuerzas)