GIDEMANDA na sa kapulisan ang duha ka mga tawo nga mipusil patay sa usa ka breeder og manok igsasabong didto sa Purok Anahaw, Barangay Buhangin, siyudad sa Davao niadtong Hulyo 10.
Mga giakusahang mipatay kang Alen Cuadrillero, 35, minyo, ug nagpuyo sa San Miguel, Dumanlas, Barangay Buhangin mao sila Wendel Zual, alyas Blakie ug alyas Jepoy, pulos lumad nga taga Cagayan de Oro City ug nagpuyo sa Barangay 5-A Bangkerohan, ning siyudad.
Sila Blakie ug Jepoy gidemanda sa mga sakop sa Buhangin Police Station pinaagi sa regular filing didto sa City Prosecution Office (CPO), Ecoland.
Ang kasong murder nakadoket sa IS# XI-02-INV-10-G-01833 ug gipaabot nalang nga moguwa ang warrant of arrest batok sa nila Blakie ug Jepoy.
Si Cuadrillero, suma sa imbestigasyon sa kapulisan, gipusil sa mga suspetsado samtang nakaparada ang iyang motorsiklo atubangan sa Immaculate Concepcion Chapel.
Giingon nga dunay gikuha ang biktima sa "U Box" sa iyang motorsiklo nga dunay plate number IW-1364 apan kalit siyang giduol sa duha kinsa nagsakay sab og motorsiklo.
Ang duha wa maglangan og panahon ilang gipusil ang biktima sa duha ka higayon sa iyang tangkugo ug tiyan hangtud nga namatay.
Bangi sa sabong ang hinungdan nga gipusil patay sa mga suspetsado ang biktima, suma sa Buhangin Police Station. (AD)