POSIBLENG dunay kalambigitan sa negosyo ang motibo sa tawo nga mipusil sa usa ka Korean national samtang nagsakay sa Toyota Fortuner sa alas 6:35 sa gabii niadtong Biyernes.
Ang insidente nahitabo samtang mihunong sa traffic light ang sakyanan sa biktima didto sa Kilometro 5, Diversion Road, Barangay Matina Pangi, siyudad sa Davao.
Sa makuting imbestigasyon sa Davao City Police Office (DCPO), nasuta nga posible nga gihuraw lamang sa wa pa mailhing tawo si Sam Tae Lee, 53, project manager CJ Toyota Tsusho Pilippines Inc. nga nakabase didto sa Barangay Darong, Sta. Cruz, Davao del Sur.
"Parang tinakot lang ang victim ng mga suspects dahil kung intended talaga nilang patayin siya, siniseguro sana nilang marami ang tatama na bala sa victim," ni DCPO Director Rene Aspera sa pakighinabi sa SuperBalita.
Si Aspera nagbutyag nga basin dunay kalambigitan ang proyekto sa biktima nga atua gitukod sa Barangay Darong, Sta. Cruz, Davao del Sur.
"Baka may nagalit sa kanya sa lugar na kung saan ginagawa ang kanilang project," panaghap ni Aspera kinsa midugang nga wala sab nila gipadaplin ang posibilidad nga nasuko ang suspek sa biktima tungod kay naipit sa trapiko.
"Tinitingnan din namin ang away away sa trapiko pero hindi naman nagasgas ang sasakyan ng victim," suma ni Aspera kinsa nagmando sa mga sakop sa Investigation Detection and Management Branch (IDMB) sa DCPO nga moadto sa Sta. Cruz aron imbestigahan ang kaso ni Lee.
Si Police Regional Office (PRO)-Davao Director Pedro Tango nagbutyag sab sa SuperBalita nga iya nang gimandoan ang iyang mga sakop nga sulbaron ang maong insidente.
"I was talking with the DCPO director, and I ordered them to purse the investigation to identify the suspects," pahayag ni Tango bahin sa kaso ni Lee.
Ang nahitabo sa biktima gikondena sa mga negusyante ilabi na sa CJTTPI ug Anflo Management and Investment Corporation (Anflocor) pinaagi sa ilang paid advertisement sa mga mantalaan dinhi sa siyudad.
Base sa imbestigasyon sa Talomo Police Station, nasayran nga sakay ang biktima sa Toyota Fortuner kauban si Engr. Edwin Derla ug lain pang tulo ka mga Koryano.
Ang sakyanan (plate number NIN-862) nga gimaneho ni Jesusito Mojares gikan sa Ulas paingon sa Maa apan mihunong sila sa Kilometro 5, Barangay Matina Pangi tungod kay "stop" ang traffic light signal.
Si Lee nagbutyag nga dihang "go" na ang signal sa traffic light kalit siyang gipusil sa wala mailhing tawo nga nagsakay og motorsiklo.
Ang biktima naigo sa iyang tuong abaga mao nga dali siyang gidala didto sa Davao Doctors Hospital.
Nakuha sa kapulisan ang usa ka baseyo sa bala sa .45 kalibre nga pistola nga gigamit sa namusil sa biktima. (AD)