DUHA ka mga tawo ang angol human nahagsa ang usa ka gamayng eroplanong nga gigamit sa pagpang-spray sa sagingan ug didto mahitugpa sa usa ka balay sa Evergreen Farm, Barangay Datu Abdul, siyudad sa Panabo, Huwebes sa buntag.

Giila ni Police Superintendent Alexander Serrano sa Panabo City Police Station ang mga naangol mao ang piloto nga si Captain Carlito Caballero ug ang usa ka Aida Candia, molupyo sa Barangay Datu Abdul, sa dakbayan.

Sumala pa ni Serrano nga samtang nag-spray sa kasagingan ang nahisgutang abyon nga gipanag-iyahan sa Lapanday Foods Corporation, giingong kalit nga naaberiya ang makina, hinungdan nga nakahukom ang piloto nga si Caballero nga mag-emergency landing.

"Nagka-loss power daw ang makina sa eroplano ug nakahukom na lamang ang piloto nga i-emergency landing," sulti ni Serrano sa paghinabi kaniya sa SuperBalita pinaagi sa telepono.

Apan dimalas sanglit pagkahagsa sa eroplano, usa ka panimalay nga gipanag-iyahan sa usa ka Akmad Rasul ang natugpahan niini.

Maayong pakaguba sa maong balay ug sa abyon ug ang tagbalay nga si Candia nahiagum og mga samad ug mga bun-og sa kalawasan kay nadat-ugan og mga parte sa balay ug sa nahisgutang eroplano.

"Ang nahibilin sa balay nga si Candia maoy gidimalas ug naigo sa paghagsa sa eroplano," dugang ni Serrano.

Ang biktimang si Candia ug ang piloto nga si Caballero daling gipangdala sa ospital aron mapatambalan.

Mihimo na karon og imbestigasyon ang mga otoridad sa hitabo. (Marvin Pineda)