KINING conflict sa duha ka running events karong Agusto 15 – ang tinuig nga University Run nga gi-organized ni Dr. Yong Larrazabal ug ang Pilipinas International Marathon sa International Pharmaceutical Incorporated (IPI) - dili bag-o nga nahitabo dinhi sa Sugbo.
Sa niaging tuig, duha gyud ka higayon, sa akong nahinumdoman lang, nga dihay duha ka footraces nga napahigayon sa samang takna, samang adlaw ug bisan tuod og dili managsama og rota, apan pulos diha ra gihapon kini sa IT Park magsugod ug matapos.
Tuod man, bisan og nagkadungan, pulos kini nagmalampuson nga way nagkainitay, kay susama ra man gihapon ang katuyo-an.
Sa positibong habig, kini nagpasabot, nga sama didto sa Kaulohan, malambuon ug mi-boom na gyud ang maong natad sa sport dinhi sa Sugbo.
Pabor sa mga Sugboanon, pabor sa atong mga running enthusiasts kay sila man ang makabenepisyo niining sunodsunod nga mga kompetisyon.
Sa samang higayon, nagpasabot lang kini nga ubay-ubay ug daghan nang mga establismento nga naagni sa pag-sponsor ug pag-organize sa maong event. Magmaya gyud unta ang mga runners.
Apan sukwahi ning umaabot nga August 15 events, kay layo pa gani duna nay mga mitumaw nga mga pagdaot sa pikas habig.
Gamiton ang bisan unsa na lang nga paagi aron maguba lang gyud ang pikas nga promosyon. Moluwat og mga masakit ug mabiaybiayon nga mga pulong.
Nisabot kita sa duha ka habig nga pulos intawon biktima sa kahigayonan. Sabtunon kaayo ang sitwasyon.
Wa magkahibaw-anay nga magkadungan diay nianang adlawa ang ilang proyekto tungod kay sa managlaing siyudad man sila nakakuha og permiso.
Di lang unta kini gamiton nga maoy mahimong gingi sa panagbangi kay di man kay kini ray running events nga mahitabo sa Sugbo sa umaabot pang mga adlaw.
Himoon nato kining leksiyon ug himoan og kasulbaran nga malikayan ang susamang hitabo sa sunod nga higayon.
In the meantime, let’s just hope and pray nga magmalampuson ang duha ka events. Di na lang ta nianang dinautay.
Nindot ang maghiusa kay sa mag-away-away ug magkatibu-agsa. Uyon ako sa sugyot ni John Pages, ang inila ug respetadong atleta ug sports leader sa Sugbo, nga magbutang na gyud og website ang mga running clubs karon aron didto ma-post ang mga schedules sa mga running events dinhi sa atoa.
(Akong email address: junmigs0622@yahoo.com)