DI god unta tingali dako kayo nga isyu pero tungod sab tingali kay daghan ang misakay o kaha may mga laing katuyuan, na-isyu na hinoon ang ‘pagpasamot og pagwapa’ ni Charice Pempengco ubos kang Dr. Vicki Belo.

Gitabangan ni Dr. Belo si Charice aron di kaayo lingin tan-awon ang iyang nawong nga, matod pa ni Dr. Belo, di ingon ana kalingin mga tulo ka tuig ang milabay. Makadako sab diay sa nawong ang pagsigeg usap og chewing gum no? Parehas sab diay anang sigeg alsag bug-at modako sab ang bukton. O-ha!

Updates on President Benigno Aquino III's presidency

Sa gipahigayon nga thermage ug Botox procedures, di na kaayo morag syopaw nga may kilay ang nawong ni Charice mga tulo ka bulan gikan karon. Unya kay kana ra bang nawonga ang nauyonan sa taga Glee ug ang iyang pagkamaayong mokanta, unsa na man unya kon malain na ang iyang nawong labina kon makasugod na siyag syuting?

Syempre mahatagan sab ni nilag solusyon. Ang taga Amerika pay atong dudahan nga batid man sila niini? Isip Pinoy, atong ikalipay kining bag-ong nakab-ot ni Charice. Pero lagi kay di man gyud mahitabo nga makauyon ang tanan, duna gyuy wa malipay niining maong kalambuan.

Sige na lang god. Ihatag na lang na ni Charice. Naningkamot sab baya intawon siya. Ana lang god.

***

Malipayon nga mitaho ang Sugbuanon nga talent manager nga si Mario Colmenares nga usa sa iyang mga talents nga misikat mga duha ka tuig ang milabay pero nasumpo lang kay milarga kini sa Amerika, mibalik sa nasud aron tutokan ang nasanta nga kapalaran sa syobis.

Ang akong gipasabot mao ang kanhi Pinoy Dream Academy scholar (nakalangkat gyud kini sa ikalimang dapit kon wa ko masayop) nga si Van Roxas. Seguradong nakahinumdom pa tingali mo ni Van. May panagway, may pamarog. Star material gyud kon mga batid sa syobis pa ang pasultihon.

Ugaling lang kay gusto gyud niyang humanon ang iyang kursong Clinical Nursing didto sa Amerika diin tua sab nagpuyo ang iyang inahan. Karon nga nakahuman na kini, mibakasyon siya sa nasud pero wa niya damha nga may mga kahigayunan diay nga nagpaabot kaniya. Pagkaswerte. Mao nang nakasulod siya dayon sa Your Song series nga nag-ulohan Maling Akala diin kauban niya sila si Ai-Ai delas Alas ug Kim Chiu. Oha! Makita na kini karong Dominggo (ambot apil na ba si Van).

Apil sab siya sa usa ka teleserye nga mosentro sa iyang abilidad sa pagkanta ug pag-arte. Gitakda kining isalida sa Septyembre. Gihikay na usab ang iyang paglugwa sa ASAP XV. Hasta ang iyang damgong makahimog kaugalingong album gisugdan na usab paghikay. Maayong pagbalik syobis, Van!

May mga tawo gyud nga swertehon no? Pakiskisa mi sa kuko, Van, bi.

***

Alang niadtong nagkaragkarag gyud nga makakita sa linawas ang Pilipinas Got Talent grand champion nga si Jovit Baldivino, niay kahigayonan nga di gyud angay palabyon.

Magpasundayag siya uban sa mga taga PGT nga sila si Markki Stroem, Sherwin Baguion, Ezra Band, Ingrid Payaket ug Keith Delleva sa sunod Sabado, Hulyo 31. Kabahini kini sa Pinoy You Got It! The Nationwide Concert Tour. Anha kini sa Pacific grand ballroom sa Waterfront Cebu City Hotel & Casino. Alas 8 s.g. magsugod ang kalingawan. Ayaw pauwahi.

***

Sa Hulyo 31 gihapon, magpasundayag usab sa Teatro Casino sa Waterfront Cebu City Hotel gihapon ang komedyanteng si Willie Nepumoceno. Alas 9 s.g. magsugod ang pasundayag. Alang lang hinuon kini sa mga may imbitasyon gikan sa tigpasiugda. Ana lang.