Alcea Maningo

Cangyan, Carmen, Cebu

“MAY uyab na ba ka, Kate?” nako pa samtang nagkakuyog mi ni Kate daplin sa karsada duol sa USC Talamban Campus.

“Wa pa,” tubag niya. Namula ang aping.

“Wa bay masuko kon magsukit-sukit ko nimo?” dugang nako. Mikuba akong dughan.

Updates on President Benigno Aquino III's presidency

“Ako ang kuyawan kon dunay masuko nako, Jade!” ni Kate.

“Kinsa man?” sukot nako.

“Ang imo diayng uyab?” mipahiyom siya.

“Wa koy uyab, Kate, uy! Pwedeg kita na lang?” seryuso ko sa akong gisulti.

Nahitiurok si Kate. Mikusog ang butok-butok sa akong dughan. Bag-o lang ming nagkaila. Ganiha pa lang. Apan para nako, morag dugay na ming kaila. Samtang naghulat ko sa tubag ni Kate gihanduraw ko pagbalik ang nahitabo kaganina.

Tungod kay dunay ‘strike’ ang mga sakyanang pasaheroan nisayo kog atang og kasakyan padulong sa eskuylahan. Nakasakay kog multicab. Paglingkod nako nakayahat kog tan-aw sa usa ka estudyanteng dalaga nga naglingkod sa atbang nako. Nag-uniporme siyag parehas sa mga estudyanteng babaye sa akong eskuylahan. Morag nakapamilyar ko niya mao nga gipahiyuman ko siya. Nibawos siyag pahiyom.

Gipara ang among gisakyan duol sa Foodland. Mga drayber nga nag-welga ang nipara. Gipakanaog mi tanang pasahero. Way nahimo ang drayber namo kay nagdalag mga bunal ang nanagwelga. Naglakaw na lang mi ni Kate padulong sa eskuylahan.

Samtang naglakaw mi giilaila ko siya.

“Ako si Jade Gisad,” gitunol nako akong tuong kamot. Naglamanohay mi.

“Ako si Kate Kila,” niya pa.

“Maghinay-hinay lang tag lakaw kay sayo pa man,” sugyot nako.

“Sige,” pag-uyon niya.

May mibutho sa akong hunahuna nga paryente ni Kate. “Ig-unsa man diay kang Max Kila?”

Nakalitan siya ug nahingangha. “Kaila diay mong papa?”

“Di man. Nakadungog lang kos iyang ngan,” pasabot nako.

“Ikaw. Ig-unsa man diay kang Mercy Gisad?” ni Kate.

“Kaila sab diay ka ni mama?” nako pa.

“Nakadungog lang sab kos iyang ngan.”

“Kon mao na, duna diay tay koneksiyon sa usag-usa bisag sa wa pa ta magkaila,” mikomentaryo ko.

“Bitaw, Jade. Mosulti na lang kos tinuod nimo. Ako nakaila na nimo daan. Usa ka hapon niapas si papa sa eskuylahan. Nitimo mi sa canteen ug didto sab ka. Niingon si papa nga ikaw anak ni Mercy Gisad, iya kanhing hinigugma sa wa pa siya naminyo kang mama. Nakit-an niya kamo nga nagkuyog kausa sa Ayala,” asoy ni Kate.

Nakapahiyom ko. “Mao ba?” nako pa. Way gikasumpay, kay gisultihan sab kong mama mahitungod sa kanhi boyfriend niya. Si mama ang nakasala kay gihimo niyang panakip-butas ang papa ni Kate samtang didto pa sa abroad si papa nako balig usa ka tuig. Pero kon wa pa kuno makabalik dayon si papa sa Pilipinas, basig ang amahan ni Kate maoy iyang nadayon.

“Unsa na man kang yeara ron, Jade?” ni Kate. Mipalahi og estorya kay hapit na mi mangabot sa gate sa eskuylahan.

“Third year,” tubag ko. “Ikaw?”

“Third year sab.”

“Unya, kadtong hangyo ko ganina, puwede bang kita na lang mag-uyab?” misukot kog usab.

“Ah, kusoga sab nimo, Jake, uy! Pamisita una sa amo,” ni Kate.

Naputol akong paghanduraw. Nanulod mi sa gate sa eskuylahan ug nagbuwag og dalan. Siya mipaingon sa Fine Arts Dept. Ako mipadung sa Psychology Dept. Apan una mi magbuwag nagbayloay mig cellphone number. Wa ko dahuma nga ang ‘strike’ sa sakyanan ang mitna sa among panagkaila ni Kate. Ug mipitik ang gugma sa akong kasingkasing. (KATAPUSAN)