ILLEGAL nga drugas nga gitawag og milk shake diha sa Barangay Kamagayan ning dakbayan sa Sugbo nikutlo na sa kinabuhi sa unom ka mga drug addict, sumala sa taho ning mantalaan. Ang milk shake nga maoy gikabuangan sa mga drug addict kombinasyon sa shabu ug sa pain killer nga Nubain nga gigamit alang sa intravenous injection. Kon di kini masumpo dayon, mag-anam nag kamenos ang mga drug addict sa syudad.
Tingalig ang milk shake mao ra unyay makasumpo sa drug addiction.
***
Giasoy ni Kapitan Tony Avila ang paggamit niining milk shake: “Ang shabu ibutang sa kutsara, i-dangdang sa lighter ug kon malanay na ang shabu, sagulan og Nubain. Unya pasuyopan dayon sa syringe ug ituslok.”
Ang mogamit og milk shake mahimong sabog gikan sa tulo ngadto sa lima ka adlaw.
Dunay silingan sa kapitan nga namatay kay naughan og tubig ang utok samtang ang uban nga nigamit niini nihugo ug nalisoan sa pangisip.
Pagkapait niini, sabog man tuod ug lima ka adlaw pero moabot sab ang panahon nga mongisi na lang bisag way kataw-anan hangtod nga mamatay.
***
Nikatap karon sa Metro Cebu ang mga massage parlors. Klase-klase ang ilang serbisyo gikan sa foot massage hangtod sa full body massage. Nunot niini, nigawas ang usa ka klase sa masahe nga gitawag og lingam, pulong Sanskrit sa kinatawo sa lalake, diin ang masahean sa babaye mao ang kinatawo sa lalake ilabi na kay giingon kini nga tambal sa prostate.
Apan dunay mga masahista nga motanyag og extra service nga all the way. Nabalaka si Cebu Gov. Gwen Garcia kay hayan nga kini mao ang sinugdan sa paggamit sa mga massage parlors nga mga prostitution dens. Aron malikayan kini, ipahimo na lang ang mga lingam massage parlors nga self-service.
***
Inanay nang nigimaw ang panagsumpaki nila ni Cebu City Mayor Mike Rama ug sa kanhi mayor ug karon Kongresista Tomas Osmeña sa habagatang distrito sa dakbayan. Niingon ang kanhi mayor nga wa siya mahimuot sa pagtudlo ni Mike Rama sa philanthropist nga si Mariquita Salimbangon Yeung isip pangulo sa Suberbody Beautification Council (SBC) kay gilakangan lang niya ang Parks and Playgrounds Commission.
Matod pas kanhi mayor, si Yeung di taga syudad unya suod pa gyud kaayong higala ni Gov. Gwen. Ang konseho alang sa pagpanindot sa syudad mao na unya ang makapabati sa relasyon ni Mike Rama ug sa kanhi mayor. Maklaro usab dinhi kon magpadayon bang magpagawong si Mike Rama ug sama sa kabaw nga duna tawmbang sa ilong nga mahimog bira-birahon sa kanhi mayor bisan asa paingon.