KON molihok lang gyud ang kapulisan, masulbad ra man ang mga krimen.

Kana kon andam sab mokooperar ang publiko. Hinuon ganahan manginlabot ang katawhan kon ipakita sab sa kapulisan ang ilang kakugi ug kamatinud-anon sa ilang gimbuhaton.

Kon magmika lang ang kapulisan sud sa ilang mga buhatan, unsa may mapaabot nilang kooperasyon? Kutob lang sila sa pagtagawtaw ug pagpitaw sa ilang mga mata.

Updates on President Benigno Aquino III's presidency

Apan ning pagkasulbad sa sunodsunod nga high profile nga mga krimen, nakita ang kamahinungdanon sa partisipasyon sa kumunidad sa pagsulbad sa krimen.

Ehemplo ini mao ang pagkasikop sa mga tulisan ug killers sa taxi driver ingon man sa gitumbok nga utok sa pagpatay sa usa ka Indian national nga tigpatanto.

Dunay kontribusyon ang publiko niini kay mao man kini ang naghatag og impormasyon.

Kon wa pay concerned citizen nga niila sa mga suspek nga sakop sa Crips gang, di gyud tingali masikop ang mga suspek.

Wa guy saksi sa ilang akto nga paghimo sa krimen. Apan sa pagsubay sa kapulisan sa mga impormasyon nga ilang nakuha gikan sa pipila ka mga tawo, ilang nasignit ang tanang mga suspek.

Kon kanunay ingon niini ang kakugi sa kapulisan ingon man ka matinud-anon sa ilang gimbuhaton, di magpanuko ang kumunidad sa paghatag sa ilang suporta pinaagi sa paghatag og impormasyon.

Niini, seguradong mominos ang mga krimen tungod kay mahadlok na man sila sa pagpabadlong kay duna may mga mata nga magtan-aw ug mga baba nga seguradong mosulti sa ilang mga nakita.