GIPAILAWOM sa imbestigasyon ang mga pulis nga duty sa Station-4 sa Mandaue City Police Office (MCPO) tungod sa pag-eskapo sa usa sa ilang mga piniriso.
Sa miaging adlaw, si Israel Judilla, 26, ulitawo, taga Brgy. Maguikay, dakbayan sa Mandaue, nakaeskapo sa bilanggoan agi sa kisame nga iyang giguba.
Si Judilla gibilanggo human madakpi sa pagmanihog sakyanan nga way lisensya.
Apan pasado alas 4:00 sa miaging kaadlawon namatikdan na lang sa nag-duty nga si PO3 Rey Manatad nga wa na diha ang ilang piniriso.
Sa ilang pagsusi, si Judilla nakaeskapo agi sa kisame sa bilanggoan.
Si Judilla unang niguba sa kisame sa bilanggoan ug dayon ngadto ngadto sa kisame sa pansayan.
Ang mga pulis lang nga duty niadtong higayona maoy gibantayan ni Judilla nga malipat hinungdan nga dali kining nakaeskapo.
Ang kapulisan daling nipahigayon og manhunt operation aron masikop og balik ang ilang piniriso, apan wa na gyod nila makit-i. Hinungdan nga si Sr. Supt. Noel Gillamac, pangulo sa Mandaue City Police Office (MCPO), nimandog imbestigasyon. (DRT)