SA subling pagsiaw sa insidente sa pagpanulis-patay sa mga taxi drayber, ang opisyal sa Metro Cebu Taxi Operators Association (MCTOA) niawhag sa kapulisan nga apilon na og checkpoint ang mga taxi.
Gipasidan-an usab ni Quito Obeso, operator sa Spider, Airland ug Scorpion taxi kinsa maoy vice president sa MCTOA, ang mga drayber nga sirad-an gyud ang ilang mga unit ug magmabinantayon sa mga pasaherong ilang ipasakay.
“Isira gyud nila ang awto kay kanang mga tulisan kasagaran mosakay na sila og kalit diha sa stop light,” pahimangno pa ni Obeso.
Hinuon ang sunodsunod nga pagpamatay karon sa mga taxi wa pa ikaalarma sa MCTOA kay matod ni Obeso posibling ang ubang insidente di gyud tulis ang motibo kon di personal grudge.
Apan ma-personal man ang motibo o pagpanulis, giawhag ni Obeso ang kapulisan nga apilon og checkpoint ang mga taxi aron masanta ang mga tulisan sa ilang pagpanulis.
“Akong gi-suggest sa kapulisan nga mohimo gyud sila og checkpoint kada gabii ug hasta awto apilon og checkpoint dili lang mga PUJ ug motorcycle,” nagkanayon si Obeso.
Kon ang mga drayber makabantay nga kadudahan ang ilang pasahero, matod ni Obeso mas maayong ihunong kini nila sa police station o barangay hall ug iparekisa.
Mahimo ra usab mangita og pasangil ang drayber kon ang iyang pasahero magpahatod og kadudahang dapit sama sa mga lagyo ug awaaw.
Isip pag-abag usab sa mga drayber nga mabutang sa peligro, matod ni Obeso nga gimandoan na niya ang iyang mga drayber nga motabang sa ubang taxi drayber pinaagi sa pag-report sa kapulisan. (CPL)