GITUMBOK nga mastermind sa pagpatay sa usa ka Indian national ug usa ka negusyante ingon man gitumbok nga bigtime drug pusher ug lider sa mga gun-for-hire sa dakbayan sa Carcar nadakpan sa mga sakop sa Theft and Robbery Section (TRS) sa Cebu City Police Office kagahapon sa alas 2:00 sa hapon gawas sa Chong Hua Hospital.
Si Jay Camotes, taga Carcar city, nadakpan nila ni Chief Insp. Bonifacio Garciano, hepe sa TRS sa CCPO human usab sa gihatag nga impormasyon nga ilang nadawat nga nagpatambal kini sa iyang walang tiil nga bardado human maunay sa iyang armas.
Matod pa ni Garciano nga ang pagsikop kang Camotes pinasubay sa warrant of arrest nga disobedience in person of authority nga gi-isyu ni Judge Grace Horma Ypil sa Municipal Trial Court sa dakbayan sa Carcar diin gisentensyahan siyag napulo ka adlaw nga pagkabilango.
Si Garciano niingon nga niadto pang Miyerkules nila sa buntag nahibaw-an nga moanha sa Chong Hua Hospital si Camotes aron sa pagpatangtang unta sa stainless nga gitaod sa iyang walang tiil human mabardado sa miaging tuig.
Apan kagahapong adlawa natempuhan sa grupo nila ni Garciano si Camotes, diin uban kini sa iyang uyab nga nisakay sa L300 van kolor green nga nagdala sa plaka GDX-399.
Lakip sa gi-hold sa kapulisan ang kauban niining si Randolph Paninsoro, 31, ulitawo, taga Perrelos, Carcar city kinsa maoy nagmaniho sa L300 human gi-hire sa pag-drive nga may bayad nga P1,500.
Gi-hold usab si Wilfedo Baring, 53, taga Sitio Cogon, Poblacion, Carcar, kanhi sakop sa Police Constabulary (PC) giingong bodyguard ni Camotes, gym instructor nga si Niel Allawan Saquibal, 38, taga Proper Talaga, Argao.
Si Garciano nipadayag nga ila pang tan-awon ang background sa mga kauban ni Camotes, hinungdan nga gi-hold lang una nila apan kon masuta nga wa kiniy kalambigitan sa mga kaso ni Camotes ila kining buhian.
Nakuha sa bag nga itom ni Camotes ang usa ka 9mm pistol, duha ka magazine nga puno sa bala, mga personal nga dukomento nga susihon pa sa kapulisan, usa ka dakong pakite sa shabu nga gibanabanang 5 gramos, upat ka mga cell phone.
Gitinguha sa TRS nga mangayog abag sa National Telecommunications Commission (NTC) aron maablihan ang cell phone ni Camotes tungod kay nagtuo silang dunay daghang mga impormasyon nga ilang makuha labot sa illegal nga drugas nga kalihukan ingon man krimin.
Si Camotes, nga nahinabi sa mga sakop sa media hugtanong nihimakak sa mga pasangil batok kaniya nga mastermind siya sa mga gun-for-hire ingon man patay, ug illegal nga drugas sa Carcar.
Gipasabot niini nga wa siya makahibawo kon nganong giapil siya sa maong mga krimen.
Gani naglibog siya nga gi-apil siya sa krimen, samtang wa usab siya masayod kon duna bay pulitikang nagpaluyo sa pasangil batok kaniya.
Si Sr. Supt. Erson Digal, director sa kapulisan sa lalawigan sa Sugbu, nibisita kagahapon sa buhatan sa TRS, nipadayag sa iyang pasalamat nga nadakpan si Camotes diin taud-taud na kining gipangita sa ilang mga sakop.
Matod pa ni Digal nga daghang krimen sa probinsya sa Sugbo ang mahatagag kasulbaran subay ning pagkasikop kang Camotes nga lider sa mga gun-for-hire ingon man nalambigit sa ilegal nga drugas diha sa Carcar ug ubang lugar sa probinysa.
Si Digal nagkanayon nga si Camotes maoy mastermind sa pagpusil patay sa negusyanting si Eric Uraca, kinsa gipatay atubangan sa iyang tindahan niadtong Hulyo 12 sa Brgy. Poblacion 1, dakbayan sa Carcar.
Sumala pa niini nga nasuko si Camotes kang Uroca human wa pautangag mga pisa sa motorsiklo.
Nadakpan ang gunman nga si Ronilo Montalla, ang driver nga si Lope Gicale, middleman nga si Rey Llanos.
“Lipay mi sa CPPO kay maloagluagan mi ani kay problema gyud mi aning Camotes, daghang kinig mga krimen nga nahimo sa probinsya. Maka-focus mi sa uban namong trabaho,” sumala pa ni Digal.
Ang upat napasakaan na hinuog kasong murder sa kapulisan sa korte sa Carcar.
Gibutyag ni Digal nga si Camotes, gitudlo usab nga mastermind sa pagpusil patay sa Indian national nga si Dohlinder Kumar, kinsa gipusil sa duha ka wa mailhing mga tawo sa Brgy. Liboron samtang nangulikta sa nangutang.
Si Digal niingon nga sa interrogation nakuha nila ang impormasyon gikan sa ubang nadakpan nga si Camotes nasuko usab kang Kumar tungod kay ang Indian national maoy nagtudlo sa mga pulis sa Carcar sa gitagoan nila ni Gicale, ug Montalla hinungdan nga nangadakpan.
Gikompirmar ni Digal nga level 2 drug pusher si Camotes sa listahan sa kapulisan sa probinysa sa Sugbu diin maka-dispose kinig 500 gramos ngadto na sa usa ka kilo matag semana sa shabu, nga i-distribute sa mga silinganang lungsod, dakbayan sa Carcar, Boljoon, Dumanjug, dakbayan sa Talisay. (Guam P. Logroño)