CAGAYAN DE ORO -- Gatosan ka mga residente ang nakasinati og pagbaha human mibundak ang kusog nga ulan niadtong Huwebes sa gabii sa pipila ka mga barangay ning Cagayan de Oro.
Ang dali nga pagsaka sa tubig sa mga drainage miresulta sa pagbaha sa pipila ka parte ning siyudad labina sa Barangay Camaman-an, Gusa, Cugman, Bulua, Consolacion, Barangay 26 paingon ngadto sa Barangay 22.
Bisan sa mokabat upat ka oras nga pag-ulan, apan namatikdan ang dali nga pagsaka sa tubig tungod sa mga basura nga nibara sa mga drainage.
Nasayran nga sa Barangay Consolacion, usa ka sakayan ang nawala human naanod sa kusog nga pagbaha sa Cagayan de Oro River, samtang sa Bulua pipila ang stranded ug wala nakauli paingon sa ilang puloy-anan niadtong gabhiona.
Sa Cugman, nasayran nga tulo ka panimalay ang naguba human gibahaan, samtang nahugno ang sementadong pader nga gipanag-iyahan ni Alarico Lim human sa kakusog sa bul-og sa tubig.
Kahinumduman nga ang mga konsehal sa dakbayan niadtong nasinati pa ang pag-init nihimo og panawagan sa mga barangay nga hinay-hinayan og limpyo ang mga drainage aron unya kung moabot na ang pag-ulan dili kaayo makasinati og pagbaha. (Stephanie V. Berganio/Sun.Star SuperBalita/Sunnex)