“KAY misukol man mao nga akong gipusil.” Mao ni pasangil sa usa sa mga suspek sa pagtulis ug pagpatay sa taxi driver nga si Modesto Heligao. Ang 17 anyos nga mitumba kang Modesto mitug-an nga diha na sa iyang mga kamot ang P200 nga kinitaan apil na ang baratuhon nga cellphone sa driver.
Akong gisukna nganong gikablit pa gyud niya ang gatilyo, matod niya gitapi daw ang iyang kamot. Wa gyud unta kinahanglana nga iyang pusilon si Modesto kay natuman na ang iyang gusto.
Ang pagduda sa kapulisan nga natandog ang iyang garbo sa dihang gitapi ang iyang kamot. Ang akong basa, maldito gyud ning batan-ona. Nahibalo ba mo nga ang P200 para long neck nga ilimnon nga ipuno sa ilang giinom sa nag-birthday nianang gabhi-ona. Para tagay ra gyud ang gipadulngan sa ilang tinulis.
Ang baratohon nga cellphone nga natagak, wa na gani sila manumbaling og punit sa dihang nagpalayo sa crime scene. Pagka barato sa kinabuhi.
BAYANIHON
Mao na ni ang akong giingong sa kapulisan nga kining mga igsoon natong taxi driver dako gyud og ikatampo sa kampanya batok sa mga sagbot sa katilingban. Ang impormasyon nga gitunol sa usa ka taxi driver ngadto sa mga pulis sa Mandaue City maoy naghawan sa dan pagka sikop sa mga suspek. Ang maong taxi driver maoy misulbad sa kamatayon sa iyang kaubang taxi driver.
Ingon niini ang sugilanon.
Ang bayaning taxi driver naagi sa nahimutangan sa upat ka suspek. Basi sa ilang modus ang batan-ong babaye maoy mipara.
Paglugwa sa tulo ka lalaki kaila man sa taxi driver ang usa.
Miwara-wara kini nga di mosakay. Wa sab magdugay naagi si Modesto ug siya maoy nasakyan. Pagkahibalo sa maong taxi driver nga mga batan-on ang suspek sa pagpatay kang Modesto mao nga iyang gipahibalo ang kapulisan og miresulta sa dinakpanay nianang Biyernes sa buntag. Wa abti og 30 ka oras human sa tulis ug patay nasulbad ang krimen. Dako ang pasalamat ni Sr. Supt. Noel Gillamac ang direktor sa kapulisan sa Mandaue City sa dakong tampo nga nahimo sa maong taxi driver. Manghinaot nga di ni siya makalimtan pagpasidungog sa sunod nga Charter Day Celebration sa Mandaue.
WEBSITE
Good news alang sa atong mga taxi driver nga nagplano pagpabarug og kaugalingong kooperatiba. Humana ang gidesenyo nato nga website. Mahimo na kini ninyo nga ablihan sa pinakaduol nga internitan.
Sa mga way byahe karon mahimo na ninyong bisitaan kining maong website. Hinuon daghan pa ta og buhatonon aron mapuno sa daghang inpormasyon ang maong website. Sigun sa dagan sa panahon, kinahanglan nga di mo magpa-iwit.
Manghinaot ko nga kining maong website makatabang sa inyong kawsa alang sa mas malamboon nga pangalagad sa mga sumasakay.