Editoryal: Tomas di ka buot ni Mike

NAIGKING si kanhi Cebu City mayor ug karon South District Congressman Tomas Osmeña sa dihang gitudlo ni kasamtangang Cebu City Mayor Mike Rama si Mariquita Salimbanong Yeung nga maoy mangulo sa Superbody Beautification Council (SBC).

Wa kauyon si Tomas tungod kay suod man kini si Yeung sa iyang mortal nga kontra nga si Gov. Gwen Garcia, unya client usab kini si Yeung ni Atty. Joy Pesquera, ang suod sa kasingkasing ni Rama nga gikontrahan usab ni Tomas.

Tungod niini, dali ra usab kaayo nga gisakyan ni Garcia ang sitwasyon ug yano kaayo kining mipahibawo nga andam siyang ibalik ang negusasyon kalabot sa 93-1 nga lote sa probinsiya nga nahimutang sa Barrio Luz sa dakbayan sa Sugbo.

Di kini maoy unang higayon nga nipalag si Osmeña sa mga gipangbuhat sa bag-ong mayor.

Sa sayo pa, niulbo usab ang kaspa niya human niya mahibaw-i nga si Pesquera nanghilabot sa Mayor’s Management Team (MMT) ubos sa pagtugot ni Mayor Rama. Kining nahisgutan sa unahan maoy una pang hut-ong ning nag-anam-anam nga nagkainit nga panagsungi tali ni Rama ug Osmeña.

Apan ang pangutana kon nganong manghilabot pa man si Osmeña sa pagpadagan sa dakbayan nga si Rama na man ron ang mayor?

Nganong magsigi man siya og komentaryo sa mga gipangbuhat ni Rama nga unta aduna man siyay laing buhatonon isip kongresista?

Bisan man tuod og nidaog si Rama ubos sa landong sa Bando Osmeña Pundok Kauswagan (BOPK) apan ang iyang obligasyon di lang alang sa maong partido kon dili alang sa kaayohan sa tibuok dakbayan sa Sugbo.

Kon unsa ang gahom ni O kaniadto sa dakbayan sa Sugbo mao usab kini karon ang gahom ni Rama.

Turno na ni Mike, Tom. Ayaw na siya’g but-i.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph