Sugilanon: Ang panugon sa sugarol

Pons M. Abatayo

Cahipa, Hipodromo, Cebu City

USA ka adlaw maoy gihisgutan ni Lagring ug sa usa niya ka anak ang bahin sa nahitabo sa miaging gabii.

“Da lagi, daan pa ko, basta kuwarta nay hisgutan, tipi gyud,” matod ni Lagring. “Tan-awa di nag-una pa og kamatay kay kang Papa ninyo si Mister Yu nga gitulis-patay kagabii.”

“Bitaw no! Pero okey pa man diay si Papa, Ma,” matod sa anak. “Wa man makurat. Ipanghatag man gani ang daog niya.”

Usa ka higayon niana may gireklamo si Pekto sa iyang asawa.

“Naunsa ka man, Lagring, nga wa man nimo pustai ang mentin ko? Nakadaog ra ba kuno untag dos mil pesos,” sukmat ni Pekto nga naguol kaayo ug maoy hinungdan nga na-admit sa ospital.

“Naunsa ka man intawon, uy? Bisag himatyon ka na, ang sugal man gihapon ang naa sa sulod sa imong hunahuna!” ni Lagring nga gikuyawan kay kanunay gi-ataki sa kasingkasing ug hayblad ang iyang bana.

Si Pekto sukad sa pagka ulitawo hangtod nangapo na lang, wa gyud makadaog bisag kausa sa iyang bisyo sa sugal, sama sa jueteng, masyao ug uban pa.

MILABAY ang pipila ka mga bulan. Didto gihapon si Pekto sa ospital kay delikado ang kahimtang.

“Lagring, paanhia ang atong mga anak kay may panugon ko ninyo… kay morag di na ko magdugay,” ni Pekto nga migunit sa kamot sa iyang asawa.

Gituman ni Lagring ang sugo ni Pekto. Gisungko niya ang ilang mga anak.

“Unsa man nang ipanugon mo, Pa?” matod sa kinamaguwangan dihang nagkatapok na sila.

“Timan-i ninyo nga kon wala na ako, kinahanglan ipadayon ang pagpalit og tiket sa swepstik ug lotto aron makatabang mo sa maayong katuyoan niini,” ni Pekto. “Ug paaria si Padre Inot kay magpamisa ko, basin og kalit lang ko mamatay.”

SUKAD niadto daghan pang mga tuig ang nangagi, apan buhi pa si Pekto. Usa ka buntag niana.

“Mga anak, may dako tang problema,” ni Lagring. “Nakadaog og 265 milyunes pesos si Papa ninyo. Dili kaha siya matiwas kon atong tug-anan?”

Nabalaka sila.

“Di tingali, Ma,” matod sa usa ka anak, “kay kalma man kaayo si Papa.”

“Bitaw, Ma, sultihan lang nato,” dason sa ikaduhang anak.

“Na, hala. Dali mo kay atong sultihan,” ni Lagring.

Mabalak-on silang miduol kang Pekto nga naghigda sa katre.

“Pekto, duna mi itug-an nimo,” matod ni Lagring. “Nakadaog kag 265 milyunes sa imong tiket sa lotto.”

“Maayo hinuon,” kalma nga mitubag si Pekto, “aron duna moy daghang kabos nga matabangan niana.”

“Apan, Papa, pag-adto namo sa opis sa lotto, giingnan man mi nga peke kuno ang tiket!” tug-an sa usa ka anak.

“Ha? Naunsa man nga hitaboa?” Ug kalit nga nasud-ipan si Pekto.

Mihuot ang iyang dughan ug dayong kamatay. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph