LAIN na sab nga kalampusan ang nakab-ot sa kapulisan sa dakbayan sa Mandaue batok sa mga pagpanulis sa dakbayan.
Usa ka menor de edad nga lalake nga temporaryong nagpuyo sa dakbayan nasikokop sa kapulisan didto sa Pinamungajan tungod kay giingong responsable sa pagpanulis sa PUJ nga magbiyahian sa dakbayan sa Lapu-Lapu.
Nasayran niadtong Hulyo 17 usa ka PUJ nga magbiyahian sa dakbayan sa Lapu-Lapu gitulis nianang gabii sa duha ka mga batan-on sa Marpa ave., barangay Umapad, dakbayan sa Mandaue.
Atol sa tulis unom ka mga pasahero nga nangabiktima ning-report sa station-5 nga sila nabiktima sa tulis ug nakuha ang ilang mga importanting butang.
Ang mga suspek namauli sa ilang tagsa ka mga dapit sa lalawigan sa Sugbo human sila masayod nga gipangita na sila sa kapulisan.
Sa gihimong follow-up operation sa kapulisan nasayran nga duha ka mga responsable nga menor-de-edad nga taga barangay Paknaan, apan lumad nga taga lungsod sa Piinamungajan.
Apan ilang nasayran nga ang mga responsable daling ningsibat pauli sa ilang lungsod.
Ang mga sakop sa station-5 pinangulohan sa ilang deputy chief nga si Insp. Wilson Abot niabot sa Brgy. Tupas, Pinamungajan, usa ka bukirang barangay sa maong lungsod nga niresulta sa pagkasikop sa 16 anyos.
Apan ang laing kauban nga menor de edad nga taga didto usab sa Brgy. Tupas daling nakasibat human makabantay sa presenya sa kapulisan.
Nakuha gikan sa balay sa suspek ang mga bag, pitaka ug uban pang mga butang nga gituohang iya sa mga biktima.
Si Abot nibutyag nga ang mga suspek maoy ilang gitumbok nga responsable sa pagpanulis niadtong mo-withdraw og kuwarta sa mga ATM machine sa ilang area of jurisdiction.
Nagkanayon si Abot nga ila na karong gi-contact ang mga biktima sa pagapanulis nga taga dakbayan sa Mandaue sa pag-adto sa ilang buhatan aron ilhon ang ilang nadakpan.