USA ka 50 anyos nga ginang nga giingon nga naay nervous breakdown nagdunggab sa iyang tiyan sulod sa ilang balay sa Sitio Kolansihan, Brgy. Lepanto, lungsod sa Alegria, Sugbo.
Si Vergilia Ygoña Iran nagpakamatay ginamit ang 11 inches nga kutsilyo. Ang kutsilyo nagtaroy pa sa iyang tiyan dihang siya naabtang nagbuy-od sa ilang kusina sa iyang bana nga si Pablo Iran.
Sa imbestigasyon nga gihimo nila ni PO2 Erwin Gedorio ug mga kauban,si Pablo nagkanayon nga maayo nang pagkatulog nila niadtong miaging gabii uban sa ilang tulo ka mga anak.
Nahigmata siya dihang nakasungog siya og saba nga nagagikan sa ilang kusina.
Dali niya kining gisusi. Nakurat na lang siya dihang iyang nakaplagan ang iyang asawa nga way panimuot nga nagtaroy ang kutsilyo sa tiyan.
Nahibaw-an sa kapulisan nga ang biktima dugay nang nag-antos sa sakit nga nervous breakdown.
Ilang nasuta nga way foul play ang kamatayon niini kon dili naghikog ra gayud ang ginang.
Si SP03 Rutillo Cardona, deputy police chief sa Alegria, niingon nga dugay nang namatikdan sa bana nga nasakit iyang asawa apan maulian ra gilayon.
Sumala ni Pablo nga magduha palang ka semana nga niabot ang iyang asawa nga nagtrabaho isip katabang dinhi sa dakbayan sa Sugbo. Sa pag-abot, iyang nabantayan nga lain na kinig linihukan. (Guam P. Logroño)