USA ang namatay ug duha ang nangaangol dihang girakrakan sa duha ka mga tawo nga nagmotorsiklo niadtong Huwebes sa gabii ang tulo ka mga sakop sa City of Bogo Anti-Crime Task Force (CEBACTAF ) samtang sila nag-roving sa Sitio P. Rodriguez Street, Brgy. Bungtod, dakbayan sa Bogo.

Updates on President Benigno Aquino III's presidency

Si Alexander Pedrano Suson, 22, ulitawo, taga Brgy. Binabag, Bogo nakaangkon og samad sa agtang ingon man sa walang bukton hinungdan sa iyang kamatayon.

Si Norben Montillano Alburo, 22, ulitawo, taga Brgy. San Vicente, nakaangkog samad sa walang tiil samtang si Daniel Nailon, 21, taga Brgy. Bungtod samdan sa toong abaga ug

walang kilid sa lawas.

Ang duha ka mga killer nagsakay sa kolor itom nga motorsiklo ug daling ningsibat human sa pagrakrak.

Si Chief Insp. Alvin Balio, hepe sa kapulisan sa dakbayan sa Bogo nga nahinabi sa Sun.Star Superbalita, nagkanayon nga samtang nag-roving ang mga biktima, kalit lang nihunong ang motorsiklo sa ilang tungod ug sa way daghang pangutana gipangrakrakan sila.

Human sa pagpamusil ang mga biktima daling gidala sa Severo Verallo District Hospital sa nahisgutang dakbayan apan way swerte si Suson gumikan kay gideklarar nga dead-on-arrival, samtang sila si Alburo ug Nailon daling gibalhin sa tambalanan dinhi sa dakbayan sa Sugbo.

Na-recover sa kapulisan didto sa crime scene ang 26 ka mga kabhang sa bala sa wa pa matinong kalibre sa armas.

Matod pa ni Balio nga si Mayor Celestino Martinez Jr. nipadayag ngadto kaniya nga sulbaron gilayon ang kaso dihang sila nagkaabot sa tambalanan sa Bogo.

Hinuon duna na silay lead nga gisubay sa maong kaso human ilang nailhan ang gunman sa maong krimin kay giingong wa kini magtaptap o mag-helmet.

Apan wa niya ibutyag ang ngan sanglit nagpadayon ang ilang operasyon.

Si Cebu Provincial Po-lice director Sr. Supt. Erson Digal niingon nga ila nang gihulma Special Investigation Task Force nga maoy tahasan sa pag-imbestigar sa maong kaso.

Si Digal niingon nga ang task force gilangkuban sa Regional Investigation Division (RID), Criminal Investigation and Detection Group (CIDG-7), Provincial Investigation Branch (PIB), Scene of the Crime Office (SOCO) ingon man kapulisan sa Bogo.

Si Digal nibutyag nga ang usa sa mga biktima nitug-an nga nakaila siya sa usa sa mga gunman sanglit wa magtaptap sa nawong.

Hinungdan nga ang mga imbestigador sa kapulisan sa headquarters sa CPPO iyang gitahasan sa pagkuha sa pamahayag sa mga biktima.

Matod ni Digal nga di pa gyud sila makasulti kon unsay motibo sa krimen.

Nagdumili usab siya sa pagtubag kon may kalambigitan ba kini sa pulitika apan ang mga sakop sa Task Force nihimog mas lawom nga imbestigasyon.

Giklaro niini nga normal lang gihapon ang sitwasyon sa peace and order sa dakbayan sa Bogo ug wa na kinahanglana pa nga mopadala sila og laing pwersa sa kapulisan.

Nasayran nga niadtong nagsingabot ang election sa Mayo daghang pagpang-rakrak sa kabalayan sa mga bukirang barangay sa mao nga siyudad gumikan sa isyu sa pulitika.