HULYO 24, 2010 kita karon ug ang Sun Star SuperBalita-Davao nagpanuigon og 11 anyos. Karong adlawa usab mao ang akong ika-onse anyos nga pagtrabaho dinhe sa Superbalita.

Murag kanus-a lang.

Akong mahinumdoman nga sa unang mga adlaw human mikatap sa kadalanan ang mga kopya sa SuperBalita, sayo pa didto na ko sa mga news stands nagsusi kun duna bay nipalit sa SuperBalita.

Matag hapon usab mohapit ko sa buhatan ni Ms. Olive D. Velasco nga maoy general manager sa Sun Star Publishing Inc., naiadto aron pagsuta kun pila ka kopya ang gi-order sa mga news dealer.

Bisan tuod kun numero uno ang SuperBalita sa Cebu, apan managlahi ang sitwasyon sa Davao ug Sugbo. Sa Sugbo mga tawo didto mobasa gyud og Binisaya.

Apan ang Davao sagol ang mga tawo ug saksak-sinagol usab ang pinulongan.

Apan naningkamot ang management nga ang editorial content sa SuperBalita mahimong "attractive ug interesting" alang sa tigbasa, ilabi na ang hut-ong nga gitawag og masa.

Inubanan sa maayong pagka-plastar nga marketing strategy ug promotion, mikusog ang halin sa SuperBalita-Davao. Hangtud karon, dili pagpasiatab tungod kay mao man kini ang matuod, wa pay nakalabaw sa Superbalita sa gidaghanon sa mga kopya nga nahalin matag adlaw.

Apan kining tanan utang kabubut-on namo sa katawhan, ilabi na ang mga suki sa SuperBalita sa mga merkado sa Bankerohan, Agdao, Buhangin, Toril, Bunawan ug sa mga news stands sa kadalanan.

Amo sab gipasalamatan kadtong mga molupyo sa mga lugar nga numero uno gihapon ang SuperBalita sama sa merkado sa mga dakbayan sa Panabo, Tagum, Mati, Digos, Kidapawan, Cotabato ug sa uban pang mga lugar.

Ang SuperBalita mao usab ang usa niadtong labing gigamit nga mantalaan sa mga magsisibya sa radyo sa Davao. Amomg gikalipay.

Isip mantalaan sa tibuok pamilya, mga sakop sa editorial ug circulation department sa SuperBalita kanunay nakigsulti sa mga tawo aron makuha ang ilang mga sugyot bahin sa mga section ning mantalaan.

Kini ang hinungdan nga dili tanan section sa mantalaan among desisyon, apan sa mga tigbasa usab nga naghatag og sugyot.

Isip mantalaan sa tibuok pamilya, ang SuperBalita maningkamot nga dugang pa nga makasilbi sa katawhan sa Davao, sa mga lalawigan sa Davao, North Cotabato, siyudad sa Cotabato ug sa ubang mga lugar.

Isip mantalaan gihapon sa tibuok pamilya, mga nagpaluyo sa SuperBalita maningkamot nga dili taguon sa mga hamtung ang SuperBalita ngadto sa ilang mga menor de edad nga mga anak tungod kay dili bastos ug labaw nga dili hilas.

Alang sa among mga tigbasa, Mabuhay!