USA ka mag-uuma ang napatay human gipusil sa mga miyembro sa New People's Army sa alas 4:00 sa hapon niadtong Huwebes didto sa probinsiya sa Cotabato.

Nailhan sa kapulisan ang biktima nga mao si Afredo Belarmino, 47, minyo ug molupyo sa Barangay Poblacion, Banisilan.

Sa nahagpat nga taho gikan sa Philippine National Police-Autonomous Region in Muslim Mindanao (Armm), nasuta nga sakay ang biktima sa iyang motorsiklo gikan sa iyang uma sa utlanan sa Wao, Lanao del Sur ug sa munisipyo sa Banisilan. Apan kalit siyang giatngan sa tulo ka mga armadong lalaki ug gipusil gamit ang kalibre .45 nga pistola.

Patay gilayon si Belarmino nga naigo sa iyang tangkugo nga milapos sa tuong parte sa iyang mata. Dali sab nga misibat ang mga mamumuno paingon sa wala matino nga dapit.

Matud ni Martina nga una gipatay ang iyang bana nagsulti siya gihulga sa NPA nga patyon kon padayon nga mosuporta sa militar.

Dako sab ang pagduda sa otoridad nga mga NPA ang miihaw sa mag-uuma gumikan dunay sulat silang gibilin sa patay nga lawas sa biktima nga nagkanayon, "asset ka sa sundalo angayan ka lang patyon."

Hangtud karon, padayon pa ang gihimong imbestigasyon sa kapulisan sa maong hitabo. (Edgardo Fuerzas)