DUHA ka mga tawo nga gituohang tigpayuhot og ilegal nga druga nasikop sa mga sakop sa Criminal Investigation and Detection Group (CIDG) ug Intel Section sa Comval Province Police Provincial Office sa gilusad nga ronda didto sa lungsod sa Compostela, Huwebes sa buntag.
Mga nasikop nailhan nga mao sila Nelson Tan, 43, ug si Juvy Mar Herbito "alyas Juvy," 30, ug pulos molupyo sa susamang dapit.
Sa report gikan sa Comval Province Police Provincial Office, nasayran nga pasado alas 5:00 sa buntag, milusad og operasyon ang mga otoridad gamit ang search ug arrest warrants nga gipagula ni Judge Hilarion Clapiz Jr. sa Regional Trial Court 11th Branch 3 sa lungsod sa Nabunturan, sa balay nga gipanag-iyahan sa usa ka Rodrigo Pausal didto sa Purok 5, Barangay Poblacion, sa susamang lungsod aron sa pagsikop sa duha ka mga suspek.
Dihang gisusi sa mga otoridad ang balay ni Pausal, nakita ug nasakmit ang pito ka mga gagmay nga heat sealed transparent sachet nga gituohang dunay shabu, siyam ka buok nga baseyo sa heat sealed transparent sachet nga gituohan sab nga gisudlan og shabu, mga drug paraphernalia, usa ka pakite sa pinauga nga dahon sa gituohang marijuana ug kuwarta balor P5,065.
Ang duha ka mga dinakpan nga dunay kasong paglapas sa Republic Act 9165 kun Comprehensive Dangerous Drugs Act naatlan sa ronda sa mga otoridad hinungdan nga nasikop sila.
Mga nasakmit nga mga butang ug mga gituohang druga gidala ngadto sa presinto sa kapulisan ug ang duha ka mga dinakpan.
Padayon karon nga gipangita sa mga otoridad ang tag-iya sa balay nga si Pausal sanglit wa siya masakpi sa ronda sa mga otoridad. (Marvin Pineda)