SUSPEK nga gitudlong maoy naglugos ug nagpatay sa usa ka magtutudlo nasikop na sa kapulisan didto sa lungsod sa Malita, Davao del Sur.

Banda alas 12:30 ang takna sa udto niadtong Huwebes, nasiplatan ang suspek nga mao si Benjie Baguio, 29, minyo, way trabaho ug lumolupyo sa Sitio Mawalay, Barangay Lais, Malita.

Nasusi sa gihimong imbestigasyon nila ni PO3 Jose Jenie Betala nga si Baguio mao ang nagpatay sa biktima apan nisibat dayon sa lugar ug didto na nadakpan sa Matina, dakbayan sa Davao.

Nakuha sab gikan sa posisyon sa suspek ang usa ka kolor blue nga Honda Wave 110 nga motorsiklo, way plate number ug matud pa gipanag-iyahan sa gipatay'ng biktima nga mao si Khame Ann Lee.

Kahinumdoman nga si Lee, 22 anyos, dalaga ug usa ka magtutudlo sa Barangay Lagumit Elementary School sa maong lungsod, nakalutan sa gilubngang balas sa suspek duol sa Lais River didto sa Sitio Kalapi sa lugar.

Nailhan ang biktima tungod sa iyang gisul-ob nga bra ug kolor sa iyang manicure sa kamot ug pedicure sa tiil.

Sumala sa kapulisan nga adunay mga samad ug bun-og ang lawas sa biktima ug diriyot sab maputol ang mga kamot niini. Samtang wa nay pantalon ug bra sa dihang nakalutan ang biktima mao nga nanaghap ang kapulisan nga gilugos daan sa suspek una gipatay.

Gihulagway nga lig-on ang mga gihuptang ebidensiya sa mga otoridad batok suspek mao nga gitanggong dayon sa ilang selda samtang gisang-at ang kasong Rape with homicide ug kasong carnapping. (Orlando B. Dinoy)