USA ka lalaki ang gitigbas og lagaraw samtang nagpahulay sa bangko nga kawayan sa Barangay Harada Butai, lungsod sa Padada, Davao del Sur.
Ang suspek giila nga mao si Wilfredo Borlado, 40, laborer, minyo, ug nagpuyo sa Sitio Duranta sa maong lugar.
Ang 18 anyos nga ulitawo nga natigbasan nailhang si Jeffrey Antipala, taga didto ra sab sa dapit.
Gihulagway sa imbestigasyon sa kapulisan nga sa alas 11:15 sa buntag, Hulyo 22, naglingkod ang biktima samtang gikakuyog ang ig-agaw nga si Jenny Costanos, sud sa Nipa nga payag sa ilang silingan ug matud pa gikatapad pa nila ang suspek.
Kalit nikuripas og dagan si Jenny aron luwason iyang kaugalingon sa dihang sa way igong hinungdan gitigbas ni Borlado ang lawas sa iyang ig-agaw, asoy niya sa kapulisan nga niresponde sa lugar sa krimen.
Sumala pa, ang biktima gidali paghatod ngadto sa Davao del Sur Provincial Hospital apan gideklara nga "dead on arrival" sa mga nag-atimang doktor nga si Dr. Albert Alesna, ni PO2 Orlando Tigley, imbestigador sa kaso.
Human sa nahitabo, nidagan palayo ang suspek sa crime scene apan boluntaryo niyang gitahan ang kaugalingon didto sa mga otoridad.
Dala sa suspek ang sundang nga adunay gibana-banang gitas-on nga unom ka pulgada ug maoy iyang gigamit pagtigbas, matod ni Tigley.
Gidala sa Villa Funeraria ang patay'ng lawas sa biktima samtang gipriso na ang suspek sa mga pulis. (Dondon Dinoy)