USA ka ginang ang gitigbas sa iyang silingan ug namatay pipila ka oras ang milabay sulod sa tambalanan niadtong Huwebes.

Ang insidente nahitabo sa alas 6:15 sa buntag didto sa Sitio Dayap, Barangay Sirawan, distrito sa Toril, siyudad sa Davao.

Ang biktima mao si Rowena Atilloso, hamtong ang pangidaron, minyo; samtang ang suspetsado mao si Kadil Patis Roger, hamtong ang pangidaron, minyo ug pulos nagpuyo sa Sitio Dayap, Barangay Sirawan.

Base sa imbestigasyon ni PO2 Ferdinand Rojas sa Toril Police Station, nasayran nga dunay giatiman nga gimbuhaton ang biktima sulod sa ilang bay dihang misaka ang suspetsado.

Giingon nga wala nabantayan sa biktima ang paghiabot sa suspetsado kinsa mitigbas kaniya gamit ang sundang tumong sa iyang walang bukton.

Ang biktima daling gidala sa iyang kabanay didto sa Southern Philippines Medical Center (SPMC) samtang ang suspetsado daling misibat paingon ngadto sa wala masayri nga lugar.

Sa inisyal nga imbestigasyon sa kapulisan, nasuta nga kanhi bikil tali sa biktima ug suspetsado ang motibo sa maong krimen.

Alas 9:00 sa buntag sa samang adlaw, suma sa progress report sa kapulisan, nakabsan sa kinabuhi ang biktima samtang giatiman sa iyang attending physician sa SPMC.

Gipangita na karon sa kapulisan ang suspetsado aron sikupon ug pasakaan og kasong murder didto sa korte.