USA ka sakop sa rebeldeng New People's Army (NPA) ang boluntaryong nitahan sa iyang kaugalingon sa barangay kapitan sa Goma, siyudad sa Digos.
Si Barangay Kapitan Nicolas Vibal maoy nitabang sa pagtahan sa sakop sa NPA pinaagi sa pagdangop sa buhatan sa Digos City Police Office (DCPO), mga alas 2:10 ang takna sa hapon sa miaging adlaw.
Nitahan mao si Romnick Noble, alyas Tarzan, 24 anyos, molupyo sa Barangay Sibulan, lungsod sa Sta. Cruz, Davao del Sur.
Nagpailang sakop sa front committeee 51 ilawom ni Kumander Marvin si Noble kinsa naglihok sa bukirang bahin sa siyudad ug sa ilang lugar.
Si DCPO Police Director C/Inspector Anthony Padua, nga nihimo sa tactical interrogation, nag-asoy nga kapin upat ka tuig na nga naglihok sa grupo sa mga rebelde si Noble.
Apan tungod kay wa na makauyon sa istilo sa ilang kawsa gawas nga gikapoy na sab kini, nakahukom si Noble nga mobalik na lamang sa kinabuhing normal, ni Padua.
Gipresentar sab dayon ngadto sa buhatan ni Mayor Joseph Pe¤as ang kanhi NPA aron nga matabangan kining makaangkon og livelihood assistance.
Gidason sa kapulisan nga way dalang armas ang NPA sa iyang pagdangop ngadto sa kapitan.
Nagpadayon pa ang kapulisan sa ilang makuting imbestigasyon aron masayran ang uban pang kaagi ni Noble.
Hinuon, giingong nadala lamang kini nga mosulod sa kalihukan tungod sa mga tam-is nga pung sa mga rebelde nga matabangan nga moalibyuhan ang iyang kahimtang.
Apan matod sa kapulisan nga angayang di na motuo ngadto sa mga rebelde ang katawhan sanglit puno lamang sa pasalig ug way kamatuoran nga makatabang nga maoy ilang pirme ipasiatab aron makadani og mga bag-ong sakop. (Dondon Dinoy)