GAWASNON na ang duha ka 'kotong cops' nga gipadlak sa Hagonoy Police Station human makabayad sa ilang piyansa. Giaprobahan sa Provincial Prosecutor's Office ang ilang temporaryo nga kagawasan.
Sila Senior Police Office 3 Carlito Albite ug PO2 John Lester Llevado nakabayad na og P124 mil matag usa alang sa ilang temporaryong kagawasan samtang pagadunggon ang ilang kaso nga 'direct bribery' ug 'anti-graft and corrupt practices act', wa pa'y labot ang kasong administratibo nga gihapak batok kanila.
Sumala pa nga nakagawas na sab ang 'pulot boy' nga si Rhuel Allera human sab makapiyansa.
Unang nakagawas si SPO2 Alfredo Timosan niadtong Hulyo 16 human sab mibayad og piyansa.
Ang upat naaktuhang nangilkil sa mga motoristang niagi sa dalang General Santos-Digos City didto sa Guihing, Hagonoy, Davao del Sur.
Nakit-an sud sa sakyanan ni Timosan ang mga gipangkumot nga kuwarta gikan sa mga motorista.
Nakuha sab gikan sa ilang posisyon ang illegal nga mga armas ug marked money nga gigamit sa Regional Police Office atol sa entrapment operation.
"Naka-piyansa na sila to their lawyers so gawasnon na sila," ni Inspector Gil Arobo, hepe sa Hagonoy PNP.
Sa pikas bahin, wala diay gi-deputize sa Land Transportation Office-XI ang tulo ka mga 'kotong cops' aron manakop og mga motoristang nakalapas sa balaud sa trapiko.
Sa gipagulang pahayag sa LTO-XI pinaagi ni Regional LTO Chief Operation Division Eleonor Calderon, wa silay katungod manakop sa simpleng traffic violation sanglit 32 lang sud sa Davao Region ang gihatagan nila og pagtugot nga mohimo sa maong lakang.
"My records show na kadtong mga police na na-assign sa may Davao del Sur are not deputize agents by the LTO," pagklaro ni Calderon.
Bisan si PRO-XI PIO Querobin Manalang nikanayon nga bisan dili sakop sa Highway Patrol Group apan ugaling nangilkil partikular sa kadalanan angayang dakpon gyud subay sa ilang kampanya. (Superbalita)