ANDAM na ang mga militanteng pundok alang sa pagahimuong march rally ugmang adlawa atol sa unang State of the Nation Address (SONA) ni Pangulong Benigno Aquino III didto sa kaulohang Manila.

"Ang mga organisasyon nga ilawom sa Bagong Alyansang Makabayan (Bayan) andam nangandam sa dakong pagahimuong march rally karong Lunes," pahayag ni Bayan spokesperson John Birondo sa Supebalita.

Si Birondo nagbutyag nga atol sa maong march rally (sugod Centennial Park hangtud Jones Park) ilang isinggit ang panawagan nga sulbaron ni Aquino ang extra judicial killings nga sagad mga biktima sakop sa militanteng pundok.

"Dinhi lang sa Southern Mindanao, duna nay 106 ka mga biktima sa extra judicial killings. And we condemn the statement of Noynoy nga nagsulti nga personal nga bangi ang motibo nganong gipamatay ang mga militante," ni Birondo.

Si Birondo nagbutyag nga dili seryuso ang administrasyong Aquino sa pagsilot sa mga nagpasiugda sa extra judicial killings.

"Mora'g giabswelto na hinuon ni Aquino si Gloria Arroyo nga maoy nagpasiugda sa pagpamatay sa mga militante," pahayag ni Birondo.

Si Birondo nagbatikos kang Aquino kinsa unang namahayag nga iyang unahon ang modernization program sa Armed Forces of the Philippines (AFP).

"Ang giuna hinuon ni Aquino mao ang modernisasyon sa AFP ug gipasagdan niya ang suliran sama sa ubos nga suholan ug kawalay trabaho," sulti ni Birondo kinsa midugang nga angay nang ibasura sa gobyerno ang Oplan Bantay Laya nga gipatuman ni kanhi pangulong Gloria Arroyo.

Si Bayan Muna regional coordinator Ariel Casilao nagsulti sab sa Superbalita nga ilang awhagon si Aquino nga maningkamot nga makahimo og daghang trabaho aron dili na mobiya sa nasud ang mga Pilipino.

"Among himuon kini nga march rally aron ipakita kang Aquino nga kinahanglan niyang sulbaron ang mga suliran sama sa joblessness nga gibilin ni Arroyo," pung ni Casilao. (AD)