TULO ka mga tawo ang gidemanda sa kapulisan didto sa City Prosecution Office (CPO) human nila gidunggab ang tulo ka mga biktima sa alas 10:30 sa gabii niadtong Hulyo 17, 2010.

Gidemanda mao sila Jeffrey Bernal, alyas Jeffrox, 19; Teopanes Sagaral Jr., alyas Ete, 19; ug Roy Aristas, alyas Baroy, 20, pulos nagpuyo sa Barangay Lizada, distrito sa Toril, siyudad sa Davao.

Ang tulo gidemanda sa kapulisan pinaagi sa regular filing ug nakadoket sa IS # XI-02-INV-10-G-01805 ang kasong murder ug IS # XI-02-INV-G-01806 ang kasong frustrated murder.

Sila Bernal, Sagaral ug Aristas maoy miguwang suspetsado sa pagdunggab patay kang Sandro Hisus, minyo, laborer ug nagpuyo sa Barangay Lubogan, distrito sa Toril.

Sa inisyal nga imbestigasyon ni PO2 Ferdinand Rojas sa Toril Police Station, gipangdunggab sa mga suspetsado sila Hisus ug mga kauban nga sila Romulo Ragas, 21, minyo, nagpuyo sa Purok 3, Barangay Lubogan ug Ramil Amancio, 36, minyo ug nagpuyo sa Barangay Daliao.

Nasayran nga nag-inom ang mga biktima sulod sa usa ka videoke house sa Saavedra, Toril Poblacion niadtong Hulyo 17 apan kalit silang giduol sa mga suspetsado ug gipangdunggab sa likod.

Mga biktima daling gidala didto sa St. John Hospital sa Toril apan tungod kay grabe ang ilang mga samad gibalhin sila sa Southern Philippines Medical Center (SPMC).

Giingon nga dead on arrival ang biktimang si Hisus sa maong tambalan samtang kritikal ang kahimtang sa iyang mga kauban nga sila Ragas ug Amancio.

Gihuwat nalang sa kapulisan nga ipakanaog sa korte ang warrant of arrest aron sikupon ang mga suspetsado nga padayon karong nagtago-tago sa siyudad. (AD)