Ely S. Tumulak
Ayala Rd., Hipodromo, Cebu City
Ang kinabuhia sa tawong kabos
Mahiagom kanunay sa mga pag-antos.
Apan kon ikaw tawong kugihan
Ang paglaom kanunay paghilantawan.
Kay bisan pa ang mga adunahan
Kon magpasagad lang nga magsalig
Ug sa dautang bisyo sila magpatuyang,
Ang ilang kadato mawagtang makuyagi.
Busa ayaw hilaki ang imong kapakyasan.
Paninguha gyud nga ikaw makabangon.
Tindog. Himoa ang laing hunat sa paningkamot
Hangtod kalampusan imong maangkon.
Himoang tahas ang pakigbisog.
Asdanga kanunay ang hagit sa kapalaran.
Itahan ang imong kakugi ug kaisog
Pagkab-ot sa gidamgo mong tingusbawan.
Kay sa ingon lamang niini nga paagi
Kitang tawo sa kalisod mahaw-as.
Wa na unyay luha sa kapait nga modahili
Kundili luha sa kadaugan ang moagas!