MILANOT sulod sa daghang katuigan ang kalangay sa kalamboan sa bukid. Apan karon naligsan na sa development. Nahimaya kaming mga bukidnon kay inanay na nga mikang-a ang ting-usbawan. Nagkuros na ang mga kadalanan nga nagsumpay sa mga barangay. Makabadhas na ang mga sakyanan. Kaniadto god makatimaho kami sa bukid og gasolina kon modagkot og lighter.
* * *
Natawo ako sa sabakan sa bukid utlanan sa Argao ug Sibonga. Napagya nga dies sentabos nalay plete paingon sa langit. Wala ko magdahom nga karon duna nay karsada, sugang dagitabnon ug pipila ka kausaban nga wala namo matagamtam kaniadto. Busa, dili maisip ang among bug-os nga pasalamat nila ni Mayor Edcel Galeos sa Argao ug Mayor Lionel Bacaltos sa Sibonga nga maoy responsabli sa pagkang-a sa ting-usbawan sa among kabukiran.
KALYO NATUMBAN
Mao diay nga gisalikway ni Mayor Tomas Osmeña si Dr. Rene Bullezer aron unta makapadayon sa pangalagad isip Chairman sa Cebu City Anti-Indecency Board (CAIB). Si Bullezer misaysay nga dunay mga negosyante nga iyang natumban ang kalyo nga suod sa City Hall. Iyang nasakpan nga dunay mga establisemento nga wala magbayad og buhis sa gobyerno. Duna say iyang girekomendar nga pasirhan kay naghulagway sa kahugaw ug sa immoral nga pasundayag ilabina sa kagabhion. Diha sa kangitngit, anaa ang kagawasan pagsud-ong sa hubo nga talan-awon.
* * *
Gilaoman ni Bullezer nga banhawon ni Mayor Michael Rama ang CAIB bisan dili na siya ang magdumala kay naa man kini gahin gikan sa panudlanan sa siyudad. Sa pagkakaron, nagpadayon si Bullezer sa iyang kawsa ug adbokasiya aron dili mabulit sa mga law-ay nga binuhatan ang atong palibot gumikan sa kompetisyon sa negosyo. Iyang gihulagway nga magsilbing citizens watch ang ilang pundok. Hugtanon nilang gisupak ang sex education sa kabataan ug ang Reproductive Health Bill nunot usab sa pagsupak sa simbahan.
* * *
Giingon ni Bullezer nga Family Planning is the mother of abortion. Dili maayong hikawan sa kalipay ang linalang. Giingon nga dunay nasod nga hugot nga gipatuman ang pagplano sa pamilya. Miabot ang panahon nga pulos na tigulang ang mga tawo ug wala nay batan-on. Busa, mimando ang ilang gobyerno nga mag brown-out og usa ka semana aron ang magtiayon makagama og bata.
* * *
Miingon ang simbahan nga supak sa family planning, nga daghang tawo, daghan usab ang utok ug mga kamot nga motrabaho. Apan dunay misaway sa maong pro-life nga baruganan. Kay kon minos ang populasyon, mominos usab ang puntil sa simbahan kay monihit man ang bunyag, kasal ug misa sa mga patay.
(yahoo ID & e-mail add. csa_1156@yahoo.com / cell #: 0905-250-4643)