MAKADAOT ba gyud ang lingam massage? Usa kini sa mga pangutana nga naa karon sa alimpatakan sa mga Sugboanon.
Di ako eksperto sa klase sa mga masahe ug, daghan ang di motuo, wa pa ko makasulay anang lingam. Mas ampay man nako ang Swiss o Swedish kay makatarong tag piyong-piyong ug makapahulay.
Wa sab makahibawo si Mayor Radaza sa Syudad sa Lapu-Lapu nga nag-atubang karon og report gikan sa city health office nga dunay duha ka lingam massage parlor sa maong syudad. Mao nga iyang giimbitar ang duha ka mga eksperto kabahin sa masahe nga mo-briefing kaniya ug sa pipila ka mga konsehal aron magiyahan sila sa pag-ateman niining maong taho.
Si Johnny Lim nga lider sa mga spa operator sa Sugbo, makadaot sa imahen sa kasagarang mga massage parlor ug spa ang nagpahigayon niining lingam kay plantada lang kini sa prostitusyon.
Matod pa ni Tess Tatara sa International NKYR Academy (INA) nga nagtudlo sa tarong nga pagmasahe ug mga balaod kabahin niini, makaayo ang lingam apan di kita maseguro kon sakto ba kining pagbuhat niini dinhi sa Sugbo.
Tinuod dunay lagda nga maghatag ang Department of Health (DOH) og eksaminasyon sa di pa hatagan og lisensya ang usa ka masahista. Ang pagtungha sa INA preparasyon alang sa maong pasulit. Apan wa man gud sa eksaminasyon sa DOH ang lingam massage.
Dakong pangutana karon kon sakto ba nga lingam massage ang gipahigayon dinhi sa Sugbo o gihimo lang kining plantada alang sa mga “extra services.” Seksi gud kaayo ang isul-ob sa mga masahista sa lingam dayon ang male organ maoy kulatahon. Buot ipasabot, pautog gyud kini. Asa man kini padulong?
UNTOUCHABLE
Atong nasayran nga ang Lapu-Lapu City Hall nag-andam na og mando alang sa pagpasirado sa usa ka lingam spa kay wa kiniy sanitary permit.
Apan naglibog ang mga opisyal sa syudad unsaon ang ikaduha kay naa man kini sulod sa Marina Mall.
Kahinumdoman, dunay karon tali sa City Hall ug ang Marina Mall. Kay lagi moinsister ang Marina Mall nga naa kini sulod sa hurisdiksyon sa Philippine Export Zone Authority (PEZA), way mga business permit gikan sa syudad ang mga establisemento nga naa sa sulod niini sulod sa katuigan.
Tungod niini, nagnegusyo sila sa Syudad sa Lapu-Lapu apan way bayad-bayad og buhis. Di sab makalili ang mga tinugyanan sa syudad kon unsay mga kalihokan niini.
Buot ipasabot, mga untouchable ang mga locator sa Marina Mall.
MGA ILEGAL?
Ang pangutana karon: gi-monitor ba sa tagdumala sa Marina Mall nga si Efrain Pelaez ang mga kalihokan sa sulod niini?
Pananglitan, unsa may kasigurohan nato nga kining lingam spa nga naa sa maong mall wa gamitang plantada alang sa prostitusyon? Nakahibawo na man kita nga kalapasan sa balaod ang prostitusyon ug ang lingam massage posible nga plantada alang niini.
Responsibilidad tuod sa Syudad sa Lapu-Lapu ang pagsiguro nga way gipahigayong prostitusyon sa maong spa apan di sila makaduol niini kay moingon man dayon ang tagdumala sa Marina Mall nga di makahilabot ang mga tinugyanan sa balaod niini.
Kakuyaw niining maong kahimtang. Dako gyud ang posibilidad nga dunay mga ilegal nga kalihokan nga gipahigayon sa maong mall kay mga untouchable man kining mga establisemento sa sulod.