ANG Mandaue City Police Office (MCPO) mosugod na sa pagpatuman sa barangay cops aron mas maepektibo pa ang pagpatuman sa kapulisan sa kahusay ug kalinaw.

Kini nagpasabot nga duna nay pulis nga kuyog ang mga barangay tanod nga mag-duty.

Una niini, si Mayor Jonas Cortes nisugyot nga mas maayong ibalik ang barangay cops tungod kay dako kinig matabang sa mga barangay tanod nga mag-roving sa ilang tagsa-tagsa ka dapit ilabi na panahon sa kagabhion.

Updates on President Benigno Aquino III's presidency

Matod sa mayor nga mas ganahan ug aktibo na unya ang mga tanod tungod kay aduna man silay kuyog nga pulis.

Nagkanayon ang mayor nga di kinahanglan nga ang pulis taga diha sa barangay, ang importante nga dunay pulis nga mo-duty sa barangay ug moabag sa mga tanod.

Gani ila naman kining gihimo kaniadto sa mga miaging mga pangulo sa MCPO apan nahunong hinungdan nga iyang gisugyot kang Senior Supt. Noel Gillamac nga ibalik kini.

Si Gillamac sa iyang bahin nihangop sa sugyot sa mayor ug niingon nga iya kining himuon sa labing dali nga panahon.

Matod niya nga dako kinig matabang sa kahusay ug kalinaw ilabi na kay nisiaw na usab karon ang suliran sa drugas ingon man ang pag-grupo sa mga batan-on nga nisalmot sa mga gang.

Si Gillamac nibutyag nga di suliran ang mga pulis nga idestino tungod kay sugod ugmang adlawa adunay 40 ka mga pulis gikan sa Regional Mobile Group (RMG-7) nga idestino sa dakbayan sa Mandaue.