SA bilanggoan nagsaulog sa iyang adlawng natawhan ang usa ka street level drug pusher human kini napusasan sa kapulisan niadtong Biyernes sa gabii sa lungsod sa Bantayan, isla sa Bantayan.
Ang suspek nga si Norberto Paragsa Villanueva alyas Norbing, 54, lumolupyo sa Barangay Sungko, Bantayan, diin kasumaran sa iyang adlaw nga natawhan kagahapong adlawa.
Pasado alas 8:00 sa gabii niadtong Biyernes dihang napusasan si Villanueva pinaagi sa usa ka buy-bust operation.
Ang maong suspek daan na nga gipanid-an sa kapulisan human sa pagkadawat nila og impormasyon nga namaligya og ilegal nga drugas si Villanueva.
Nitahan na kaniadto si Villanueva sa Oplan Tokhang sa maong barangay ug giisip pa kini nga nangulo sa mga nitahan sa naasoy nga barangay.
Nasakmit gikan kaniya ang duha ka pakete sa gituohang shabu, tulo ka P100 bill nga maoy gigamit isip buy-bust money.
Mag-atubang si Villanueva og kasong kalapasan sa Sec. 5 sa Art II sa Republic Act 9165 o ang Comprehensive Dangerous Drugs Act.
Giawhag usab sa mayor sa lungsod nga si Ian Christopher Escario ug ang hepe sa Bantayan Police Station Police Chief Insp. Florendo Laude Fajardo ang tanang residente sa Bantayan sa pagtaho bahin sa malapason o dunay namaligya og illegal drugs.