MAGUL-ANONG nidangop sa kapulisan sa lungsod sa Ginatilan, Sugbo ang usa ka pamilya human naugdaw ang ilang balay sa miaging kaadlawon.
Nagduda ang pamilya nga gituyo sa pagsunog ang ilang balay sa usa nila ka silingan tungod sa giingong utang wa kabayri.
Si Natalio Palangi, 64, laborer, taga Brgy. Palanas, lungsod sa Ginatilan, Sugbo, ni-report sa kapulisan nga wa silay nahipos nga mga butang.
Ang ilang balay gama lang sa light materials.
Si PO1 Michael Sevilla, desk officer sa kapulisan, niingon nga si Palangi ug ang iyang pamilya nibelar sa haya sa ilang paryente niadtong Huwebes sa gabii sa laing barangay.
Apan sa ilang pag-abot niadtong Biyernes sa buntag gipahibawo na lang sila sa ilang anak nga naugdaw na ang ilang balay.
Ang nangahibilin na lang nga mga butang mao ang mga karsones ug sinina nga gipanghayhay sa gawas sa ilang balay.
Si Palangi nibutyag sa kapulisan nga silingan ra niya ang iyang gidudahang maoy nagdaob sa ilang balay gumikan sa kalagot niini nga wa siya makabayad sa iyang utang.
Matod niya nga nasuko ang iyang silingan kaniya kay sa panahon nga maningil kini maatol usab nga wa siyay kwarta.
Hinuon wa gibutyag niya ang ngan sa iyang silingan apan wa siyay planong mokiha niini. (Guam P. Logroño)